Po e them hapur se ndahem nga partia ime, nëse partia ime vendos të votojë këtë ndryshim kushtetues. Pra, vota ime do të jetë kundër.
Deputeti i Partisë Demokratike Genc Ruli, është kundër ndryshimeve në Kushtetutë për martesat Gay. Në mbledhjen e djeshme të grupit parlamentar demokrat, Ruli ka deklaruar se një parti konservatore si PD, nuk mund të votojë këto ndryshime në Kushtetutë për ndryshimin e orjentimit seksual. Ai ka deklaruar se ndahet nga Partia Demokratike nëse voton pro këtyre propozimeve për ndryshime në kushtetutë.
“Pjesa më e rëndësishme, për të cilën do të doja të flisja është ajo e ndryshimeve që kërkohen të bëhen në Kushtetutë mbi orientimin seksual. Ne jemi parti konservatore dhe nuk mund të votojmë ndryshime kushtetuese që shkojnë në një tjetër linjë. Që në fillim e kam ditur që me b….dhe me zor do të futemi në Europë, por jo të futemi se do shesim b…. Unë po e them hapur se ndahem nga partia ime, nëse partia ime vendos të votojë këtë ndryshim kushtetues. Pra, vota ime do të jetë kundër”, ka thënë Ruli.
Gazeta Panorama që ka zbardhur debatet me dyer të mbyllura thotë se për këtë çështje Ruli ka deklaruar që edhe nëse PD do të dakordësojë mbi këto ndryshime, vota e tij do të jetë kundër.
Qëndrim të ashpër ish-ministri i Energjetikës ka mbajtur edhe në lidhje me procesin e vetingut. Ruli kërkon që të mos jenë vetëm ndërkombëtarët, ata të cilët do të kalojnë në filtër të gjithë gjyqtarët dhe prokurorët, por të vlerësohen edhe ekspertët vendës. Qëndrim të njëjtë ka mbajtur edhe ishministri i Mbrojtjes, Arben Imami.
Sipas Imamit, ligjvënësit nuk duhet të tejkalojnë kompetencat e tyre duke ndryshuar Preambulën e Kushtetutës, ndërsa thekson se për çështjet delikate si ajo e ndryshimeve për orientimet seksuale mund të kalojnë përmes referendumit. Basha ka shpjeguar se opozita nuk do të jetë hermetike në propozimet e saj për Reformën në Drejtësi, por nuk do të negociojë në lidhje me arkitekturën e sistemit të Drejtësisë, duke mos lejuar kapjen politike.
