Nga Mesila Doda
Kur pashë pamjet e para të protestës së djeshme pata ndjesinë e një intrige të mirëmenduar. Ishin as 20 policë që dukeshin krejt pasivë dhe dukej sikur po i lejonin ata vetë protestuesit të përshkallëzonin aktet e tyre.
Përpara pak javësh isha në një protestë të PDIU-së para Ministrisë së Jashtme dhe e pësova në vetë të parë dhunën dhe trajtimin violent të forcave policore, të reparteve speciale të Lleshit, ndaj nuk kam asnjë dyshim mbi egërsinë dhe çmendurinë e rioshëve që ka futur në sistem Lleshi e ku sipas informacioneve të dhëna nga mediat rreth 250 prej tyre janë me rekorde kriminale dhe kanë hyrë në polici me qëllimin kriminal që të keqpërdoren gjatë fushatës elektorale.
I gjithë ky inskenim i djeshëm u bë që të flitet për pemët e djegura të Vitit të Ri dhe të hiqet vëmendja nga vrasja e një djali që ishte pranë banesës së tij, pa maskë dhe u largua nga një patrullë policie.
Kjo mënyrë e poshtër të vepruari me ndërgjegje më sjell në mendje veç një fjalë: “O Zot, sa të ligj jeni!”.
Ju jeni në gjendje që të mbuloni çdo krim me një intrigë, me një manipulim mendjesh njerëzore. Tek e fundit, nazistët nuk kanë bërë më shumë, komunistët po ashtu. Ju po instaloni një sistem kriminal të manipulimit të mendjes njerëzore që të vazhdoni të vidhni e të shkelni mbi jetët e njerëzve.
Dorëheqja e Lleshit do ishte më e pakta. Është vetë ai që i dha forcë policisë të dhunojë opozitën dhe çdo qytetar të lirë të këtij vendi që nuk i përkiste sektit të Rilindjes. Si një shërbëtor i mirë e kreu krejt pa dinjitet detyrën në mbrojtje të shefit te tij që ka një mendje të prishur edhe më intrigante se Llesh kimiku dora vetë.
Druaj se shefi do e bëj shpejt harakiri, sepse shërbyesit e padinjitet nuk i duhen kujt.
Më së fundi, më duhet t’ju them se veprimet e të rinjve të sensibilizuar nga rrjetet sociale janë një këmbanë alarmi për paqen sociale në vend. Durim nuk ka më, ndaj çdo akt mund të ndërmerret nga njerëzit e dëshpëruar. Politika duhet të gjejë rrugën e zgjidhjes që të shpëtojmë këtë pak Atdhe që na ka mbetur pa u vjedhur.
P.S. Po pres ende deklaratat e zëdhënësve të Rames nëpër ambasada që të deklarojnë se mbështesin reformën e Rilindjes në polici dhe të dënojnë dhunën e demonstruesëve që djegin pemët artificiale të Krishtlindjeve. E kanë vonuar shumë këtë radhë, po me kismet edhe këtë herë nuk do e zhgënjejnë shefin.
