Kryetari i Partisë Demokratike, Lulzim Basha ka reaguar këtë të hënë në lidhje me situatën pandemike, ku shprehet se dje është shënuar rekord i rasteve të reja me Covid në vendin tonë dhe qeveria nuk ka asnjë përgjigje në lidhje me këtë.
Përmes një postimi në rrjetin social Facebook, Basha shkruan se spitalet janë në kolaps, të sëmurët dergjen në ambulanca, ndërsa Rama ju merr shqiptarëve lekët e taksave, dhe në vend që ti investojë në shëndetësi, jua jep miqve të vet.
“Dje kishim mbi 500 raste të reja të raportuara të koronavirusit në Shqipëri, numri rekord më i lartë që nga fillimi i pandemisë. Çfarë bën Rama? Asgjë! Ai nuk ka asnjë plan. Spitalet janë në kolaps, të sëmurët dergjen në ambulanca. Rama ju merr shqiptarëve lekët e taksave, dhe në vend që ti investojë në shëndetësi, jua jep miqve të vet. Pasi shkatërroi ekonominë, Rama po shkatërron jetët dhe shëndetin e njerëzve. Ai duhet të largohet. Bashkë do ti fitojmë zgjedhjet, do ta ngremë ekonominë dhe do të sigurojmë ndihmë për çdo familje“, shkruan Basha.
