Treguesit e financave të vendit vijonë të përkeqësohen
“Informacioni i ri ekonomik dhe monetar i muajve të fundit ka qenë përgjithësisht në kahun e poshtëm të pritjeve tona. Rritja ekonomike e tremujorit të katërt të vitit 2015 rezultoi disi më e ulët se parashikimi, ndërsa inflacioni i tremujorit të parë të vitit 2016 shënoi rënie të fortë dhe të papritur si pasojë e goditjeve të ofertës”. Ky është qëndrimi zyrtar I Bankës së Shqipërisë për zhvillimet e muajve të fundit në ekonominë shqiptare. Kjo deklaratë e bërë nga guvernatori vjen teksa zyrtarë të qeverisë refuzojnë të pranojnë se ekonomia po ecën më dobët se parashikimi, duke e quajtur këtë thjesht një “perceptim”.
Eshtë hera e 16-të që Banka e Shqipërisë ka ulur normën bazë, që nga shtatori 2011, kur filloi politikën e lehtësimit monetar, që vitet e fundit ka qenë mjaft agresive. Megjithatë, efektet në nxitjen e kreditimit kanë qenë minimale. Në mars 2016, me bazë vjetore, kredia për ekonominë ka rënë me 2 për qind, e nxitur dhe nga vala e fshirjes së kredive të humbura. Kreditë e këqija në kahun tjetër, iu rikthyen sërish rritjes, duke u ngjitur në gati 19 për qind në fund të tremujorit të pare të 2016.
Politika lehtësuese ka nxitur ndërkohë daljen e kursimeve me afat nga bankat. Në mars, depozitat me afat të individëve në lekë ranë me 1.7 miliardë lekë, ndërsa me bazë vjetore janë tkurrur me 10 për qind. Kjo nuk ka ndikuar në rritjen e konsumit, që në 2015-n ishte negativ për herë të parë që nga viti 1998. Këto janë sinjale të qarta, se megjithëse Banka e Shqipërisë po bën maksimumin në sulmin e saj për të shpëtuar ekonominë, ajo nuk mund t’ia dalë e vetme.
