Plot 12 kontrata të kompanisë së Igli Gjelishtit, të akuzuar nga PD se i ka kaluar paratë në televizionin e Carlo Bollinos, rezulton se janë zhvilluar pa garë.
Sipas Agjencisë së Prokurimit Publik në 2 prej tyre ka marrë pjesë vetëm Image Comunication Development, ndërsa në 10 të tjera konkurrentët janë skualifikuar. Po ashtu në rreth 3 raste projekti është fituar në bashkëpunim
Tirane- Opozita ka hedhur akuza ndaj kompanisë “Image & Communications Development” e cila është nën administrimin dhe pronësinë e Igli Gjelishtit. Sipas selisë blu, kompania ka përfituar 7.5 miliardë lekë, i ka kaluar paratë te kompania mediatike Report Tv të Carlo Bollinos.
Por çfarë ka ndodhur në të vërtetë në dy vitet e fundit me tenderat e fituar nga kjo kompani?
Çudia- Sipas të dhënave të Agjencisë së Prokurimit Publik, rezulton se “Image & Communications Development” ka nënshkruar rreth 12 kontrata me një fond limit prej 588 milionë e 415 mijë e 127 lekë pa TVSH.
Por në 10 prej tyre rezulton se janë skualifikuar të gjithë operatorët e tjerë ekonomikë pjesëmarrës, duke lënë kështu në garë vetëm këtë kompani e cila autmatikisht është shpallur edhe fituesja.
Çuditërisht, kompanitë pjesëmarrëse në 7 prej këtyre rasteve nuk kanë paraqitur fare ofertë.
Tenderi më i fundit që është ndjekur kjo procedurë është ai me objekt “Blerje shërbim automatizimi dhe monitorimi aktiviteti për inspektorët” për Drejtorinë e Përgjithshme të Tatimeve me një fond limit prej 106 milionë e 200 mijë lekëve.
Kontraktuesi i së cilës është Agjencia Kombëtare e Shoqërisë së Informacionit dhe fitues është shpallur bashkimi i operatorëve ekonomikë “IVA ELEKTRONIK” dhe “Image &Communications Development” shpk me një ofertë prej 99 milionë e 891 mijë lekë.
Kompania tjetër pjesmarrëse është skualifikuar pasi nuk ka paraqitur ofertë.
Në 3 kontratat e tjera ato janë skualifikuar për mospërmbushje të kërkesave të dokumentave standarte të tenderit.
Megjithatë, nuk mungojnë as rastet kur kompania “Image & Communications Development” është e vetmja që ka marrë pjesë dhe automatikisht është shpallur dhe fituesja dhe kjo ka ndodhur në dy kontrata.
Bëhet fjalë për tenderin me objekt “Blerje Sistem Biletarie” me një fond limit prej 11 milionë e 890 mijë lekësh, për të cilin operatori i sipërpërmendur ka ofertuar me një vlerë prej 11 milionë e 362 mijë e 500 lekësh, kontraktor i së cilës është ujësjellës kanalizime Tiranë.
Në rastin e dytë, autoriteti kontraktues është Posta Shqiptare për kontratën me objekt “ Blerje SMS”, me një fond limit 2 milionë e 460 mijë lekë dhe për të cilin, kompania e Igli Gjelishtit ka ofertuar 120 mijë lekë më pak dhe duke qenë i vetmi në garë automatikisht është shpallur dhe fituesi.
Gjithësesi në të paktën 3 raste tenderat janë fituar në bashkëpunim me kompani të tjera.
