Presidenti i Kosovës, Hashim Thaçi ka drejtuar gishtin tek ata që akuzuan se një marrëveshje e fshehtë Kosovë- Serbi ishte planifikuar për ndarje territoresh dhe cënim të sovranitetit.
Kreu i shtetit thotë se të gjitha flluskat e gënjeshtrave ranë me nënshkrimin e marrëveshjes në SHBA, duke konfirmuar se nuk kishte thika pas shpine.
Gjithashtu Thaçi, tha se më nënshkrimin e marrëveshjes, më 4 shtator, në Shtëpinë e Bardhë, është konfirmuar përkushtimi i SHBA-së për përkrahjen e Kosovës.
Më tej ai thekson se Kosova po paguan shtrenjt vonesat pasi marrëveshja me Serbinë duhej nënshkruar 2-3 vite më parë dhe s’duhet të lejohet më që mentaliteti tribal të ndikojë në marrëveshjet që nënshkruhen.
“Gjatë këtij procesi, të vështirë, hasëm në akuza e konspiracione. Me formalizimin e marrëveshjes, këto u treguan të rrejshme, të paqëndrueshme e paragjykuese. Ranë flluskat e gënjeshtrave për harta të ndarjes së territorit, kërkojini falje Kosovës. Ku shkuan gjithë ato gënjeshtra.
SHBA duhet të ketë rol udhëheqës. Të gjithë e kemi kërkuar. Ndodhi. Kërkuam marrëveshje në Uashington. Ndodhi. S’duhet të lejojmë që mentaliteti tribal të ndikojë në vonesa që Kosova po i paguan shtrenjtë. Marrëveshja u vonua për 2-3 vite”- tha Presidenti i Kosovës.
