Ministrja e Shëndetësisë Ogerta Manastirliu ka deklaruar ditën e sotme se me hapjen e shkollave do të forcohet puna për gjurmimin e rasteve të reja të Covid-19 me qëllim izolimin e çdo vatre infeksioni.
Në një takim me epidemiologët e Tiranës, Manastirliu tha se do të shtohen me 30% ekipet e epidemiologëve dhe ndihmës epidemiologëve, pjesë e planit të vjeshtë-dimrit për përballimin e situatës.
“Hapja e shkollave do shoqërohet me rritje të kapaciteteve ndaj vendosja e ekipeve të reja është vlerë e shtuar.
Përpos kapaciteteve logjistike të shtuara, tashmë kemi mundësinë të rrisim gjurmimin, hetimin dhe testimin në të gjithë vendin.
Jemi në një moment shumë serioz dhe nuk duhet të lëshojmë nga masat që kemi marrë. Gjej rastin të falenderoj qytetarët.
Lufta me virusin nuk ka përfunduar. Jemi përpara hapjes së shkollave dhe bashkëpunimi me koordinatorët e shkollave do luajë një rol të shtuar në izolimin e rasteve”, deklaroi Manastirliu.
