Një person ka humbur jetën dhe 119 raste të reja janë konfirmuar pozitiv me koronavirus, këtë të premte në Kosovë.
Ministria e Shëndetësisë bën me dije se në 24 orët e fundit ka vdekur vetëm një person, duke shënuar numrin më të vogël të vdekjeve brenda ditës, që prej disa javësh.
“Gjatë 24 orëve të fundit, në Laboratorin e Mikrobiologjisë Molekulare në IKShPK me metodën RT-PCR dhe në laboratoret private, janë testuar gjithsej 480 mostra të marra nga ShSKUK dhe gjurmimi i kontakteve të rasteve në terren, prej të cilëve rezultojnë 119 raste pozitive. Brenda 24 orëve është raportuar 1 rast i vdekjes me SARS CoV-2 pozitiv”, thuhet në njoftimin i Institutit Kombëtar të Shëndetit Publik.
Deri më tani numri i të infektuarve me koronavirus në Kosovë ka shkuar në 13.100 raste nga 49.757 persona të dyshimtë në virusin SARS-CoV-2, prej të cilëve 499 persona kanë humbur jetën.
