Futbollisti i Tiranës, Gentjan Muça, ka dalë përpara gazetarëve në sallën e konferencave për shtyp të klubit, për t’i kërkuar Komisionit të Apelit pranë FSHF-së ta rishikojë vendimin për pezullimin e tij me afët aq të gjatë, gjë që nuk kishte ndodhur kurrë më parë me të tillë motivacion, si nxitje të urrejtjes apo racizëm. Sipas tij, një rrethanë lehtësuese është që në karierën e tij 10-vjeçare nuk ka qenë asnjëherë objekt komisionesh disiplinore, madje është ndëshkuar vetëm dy herë me karton të kuq
Deklarata e plotë e futbollistit
“Dje gjatë përgatitjeve me skuadren u njoha me vendimin e Komisionit te Disiplinës. Nuk e kam pritur aspak mirë. Unë jam futbollist dhe jo kriminel. Gjatë të gjithë karrierës sime 10-vjeçare kam marrë vetëm dy kartona te kuq dhe nuk kam qenë kurrë objekt gjykimi në komisionet disiplinore. Jam praktikant i fesë dhe nuk kam patur në asnjë moment për qëllim të nxis dhunë, urrejte apo të përdor shprehje raciste. Unë përpara se të bëhesha futbollist kam qenë tifoz i Tironës dhe si i tillë, 20 minuta pasi ka përfunduar ndeshja kam kënduar me tifozët. Kenget jane vetem shprehje tifozerike të cilat këndohen gjithmonë në stadiume. Gjyqtari i ndeshjes nuk e ka ndërprerë ndeshjen kur ato këngë këndoheshin gjatë lojës. Unë duke besuar tek gjykimi i tij nuk e mendova se kishte diçka që nuk duhej thënë pasi dënohej. Përsa i perket Beogradit, nuk kam patur parasysh asgjë raciste. Unë partnerin tim në mbrojtje, Dejan Karan, e kam shok nga Beogradi, ashtu siç kam dhe zv/trajnerin Ivan Gvozdenoviç. Ata nuk e kanë keqkuptuar këtë shprehje tifozerike. Persa i përket komunizmit, askujt nga ju këtu nuk besoj se i vjen keq që u permend emri i një sistemi që nuk i ka sjellë të mira vendit. Kam besim se Komisioni i Apelit do ta rishikojë vendimin dhe unë do të rikthehem të luaj futboll. Jam në kulmin e karrieres sime dhe ky vendim është vrasje për mua. Falenderoj tifozët për mbështetjen që më kanë dhënë. Unë jam një prej tyre”.
