Drejtoresha e Institutit të Shëndetit Publik, Albana Fico kërkon mirëkuptimin e artistëve lidhur me masën e qeverisë për mbylljen e klubeve të natës dhe të gjitha lokaleve me muzikë.
Fico tha se vendimi nuk është “impulsiv” por një masë që implementohet sa herë ka një problematikë të caktuar. Ajo tha se klubet e natës janë identifikuar tashmë si vende me grumbullim të lartë njerëzish.
“Do të kërkoja me shumë përulësi që ta shikojnë këtë jo si një atak për atë çka ata bëjnë, por si një masë që është e detyrueshme nga zori jo nga qejfi. Gjatë kësaj pandemie, si në të gjithë vendet e botës ka masa që implementohen sa herë ka problematika të caktuara. Kërkojmë mirëkuptimin. Këto nuk janë vendime të marra në impuls. Fakti që ke grumbullime të identifikuara në këto vende, me grumbullim të të rinjve, që janë pjesa jonë më e dashur dhe më e shtrenjtë, por që kanë edhe vështirësi të pranojnë masa të reja. Por unë e shoh botën pak më ndryshe sepse besoj që nëse ndërmarrim një masë që na kushton gjatë verës, ne e kemi shumë në dorë, dhe bëjmë një ndryshim të jashtëzakonshëm nëse sillemi në mënyrën e kërkuar,” u shpreh drejtoresha e ISHP-së.
