Drejtoria e Tatimeve: Bazë analiza e vlerësimit të riskut për bizneset
Aksioni i radhës më të cilin do të përballet biznesi është verifikim për pagat në vend apo nga zyra e administratës tatimore. Drejtoria e Tatimeve ka njoftuar sipërmarrjet se në bazë të analizës së riskut, do të kontrollohen për verifikimin e pagave të deklaruara. Për të zbuluar parregullsitë inspektorët tatimorë do të bëjnë krahasimin me kompanitë e të njëjtit sektor, si dhe verifikimin me deklaratën vjetore individuale të të ardhurave. Ky është një aksion i dytë i administratës tatimore për këtë vit. Nga fillimi i janarit tatimorët, e nisën punën me kontrollet e inventareve të bizneseve. Sipas njoftimit që kanë bërë tatimet kriteret e përzgjedhjes së tatimpaguesve për kontroll do të jenë:
Verifikimi i pagave të deklaruara me ato reale bazuar në informacione të marra nga palë të treta apo verifikimi në vend. Verifikimi i pagave të deklaruara me ato të subjekte të tjera private apo publike të të njëjtit lloj aktiviteti apo të ngjashëm me to, të cilët kanë të punësuar punonjës me të njëjtin lloj profesioni. Verifikimi i pagave të deklaruara me ato të deklaruara nga individet nga Deklarata individuale vjetore e të ardhurave.
Aksioni i ndërmarrë nga administrata fiskale vjen në një kohë kur deklarimi i pagave më i ulët se realja në sektorin privat është një nga burimet më të mëdha të evazionit në vend. Shqipëria mbledh të ardhura nga kontributet e sigurimeve shoqërore vetëm 5 për qind të Prodhimit të Brendshëm Bruto ndërkohë që mesatarja rajonale është më shumë se dyfishi. Por ky rezultat i ulët regjistrohet në një kohë që vendi ynë ka nivelet më të lartë të taksës së punës në rajon. Nga 26 për qind që është kjo taksë 15 për qind paguhet nga punëdhënësi dhe 11 për qind nga punëmarrësi.
