Ministrja e Shëndetësisë dhe Mbrojtjes Sociale, Ogerta Manastirliu, një ditë më parë konfirmoi se ekipet e futbollit mund të nisin stërvitjen prej datës 18 maj.
“Në vijim të planit, prej datës 18 maj nis procesi mësimor dhe provimet e maturës shtetërore, hapen baret dhe restorante vetëm me ambiente të jashtme, shtohen fluturimet nga jashtë, hapen muzetë dhe sitet arkeologjike, lejohen stërvitjet në ambiente të hapura, ndalohen aktivitetet sportive dhe kulturore”, tha Manastirliu mes të tjerash.
Sigurisht që me këtë plan kampionati është në rrezik, pasi ende nuk ka një datë se kur ekipet mund të stërviten normalisht. Prej orës 10:30, sikurse ishte planifikuar, një grup pune i FSHF, me në krye Sekretarin e Përgjithshëm të FSHF, Ilir Shulku, janë paraqitur pranë Ministrisë.
Objekt diskutimi mes grupeve të punës do të jetë protokolli sanitar që FSHF ka hartuar, në mënyrë që ekipet të stërviten dhe të luajnë ndeshje pa rrezikuar përhapjen e koronavirusit. Në këtë takim shpresohet që të merret “OK” për nisjen e përgatitjeve para 18 majit, në mënyrë që të mos ketë më pas një ngjeshje të kampionatit.
Testet për futbollistët janë një nga temat më të rëndësishme, pasi kryerja e tyre ka një faturë të madhe financiare dhe duhet parë nëse klubet janë në gjendje t’i përballojnë këto shpenzime ekstra. Mbetet të shihet se çfarë do të ndodhë pas këtij takimi. /abcnews.al
