Rusia regjistroi sot numrin më të lartë të rasteve pozitive me koronavirus që nga shpërthimi i pandemisë.
Gjatë 24 orëve të fundit, janë konfirmuar 10.633 raste të reja të koronavirusit duke sjellë numrin e përgjithshëm në 134.686.
Ndërkohë, numri i viktimave ka shkuar në 1.280, ku gjatë orëve të fundit humbën jetën 58 persona.
Më shumë se 4,1 milionë teste janë kryer në vend deri më tani në përpjekje për të zbuluar infeksionet me COVID-19 në fazë të hershme.
Tre zyrtarë të lartë rus u shtruan në spital këtë javë me virus, përfshirë kryeministrin Mikhail Mishustin.
Më 2 maj, një grup shkencëtarësh nga Universiteti i Teknologjisë dhe Dizajnit në Singapor (SUTD) publikuan një model të bazuar në matematikë, sipas të cilit 99 përqind e rasteve në Rusi do të zbulohen deri më 3 qershor dhe epidemia duhet të përfundojë deri në mes të gushtit.
