Deputeti Lefter Maliqi akuzoi Kryeministrin Edi Rama se po jep show në kohën kur vendi po përballet me pandeminë e Covid-19.
Maliqi tha se kjo nuk është një luftë, sikundër e trajton Edi Rama, por një sfidë që do e kalojmë, sikundër shumë sfida të tjera që ka kaluar njerëzimi.
“Na del Kryeministri dhe na flet për luftë, hedh në rrjetet sociale madje edhe thirrje ruajuni nga bombat. Po nga cilat bomba? Me kë jemi në luftë, me kë po luftojmë? Kjo është një sfidë. Dëgjoni ekspertët e fushës dhe jo një kryeministër që del dhe flet për bomba, që na nxjerr ushtrinë në rrugë dhe harxhon mijëra litra karburant. Ato para që harxhon për makinat e ushtrisë që e ke nxjerrë nga kazermat, çoja njerëzve në nevojë. Dilni dhe me qese ndihmash dhe thoni kemi ndihmuar aq e kaq. Po e a dini ju që aq ushqime sa shpërndani nuk mjaftojnë as për dy ditë. Hiqni maskat, mos kini frikë. Dëgjoni OBSH, dëgjoni ekspertët dhe mos dëgjoni këtë Kryeministër që del bën edhe rolin e mjekut”, tha Maliqi nga foltorja e Kuvendit, duke i kërkuar deputetëve që të mos kenë frikë dhe të heqin maskat.
