Në fillim të mbërritjes së lajmit, u konceptua si e pamundur që trajneri i përfaqësueses tonë, Xhani De Biazi, pasi të përfundonte me ne do të ulej në pankinën e Kombëtares së vendit të tij. Dhe në këtë rast, sigurisht që janë të favorizuar skeptikët, pasi të drejtosh Italinë nuk do të ishte vetëm kulmi i karierës së kujtdo, por edhe konkurenca është e jashtëzakonshme. Në garë për të pasuar Konten janë nga profesorë të trajningut, deri tek teknikë të spikatur të Serisë A, apo të kampionateve më të mëdhenj të Europës. Por duket se De Biazi e ndjen veten të përshtatshëm dhe madje ka filluar të lobojë, ose me fjalë të tjera të tentojë ta arrijë edhe me mënyra shqiptare synimin e tij të ri. Trajneri ynë ishte në stadiumin “Olimpiko” për të ndjekur Lacio – Inter, por bashkë me të edhe Mihajloviç e Filipe Inzagi, ndërkohë që shtypi vendas nxitoi të jepte arsyet e pranisë së të treve. Gjithçka është e lidhur me presidentin Lotito. Mihajloviç thuhet se është prenotuar për trajnerin e ri të Lacios sezonin e ardhshëm, Filipe ndodhej në stadium për Simonen që po drejton aktualisht pas shkarkimit të Piolit, ndërsa De Biazi po mundohet të shfrytëzojë miqësinë e ngushtë të Lotitos me presidentin e FIGC, Tavekio, i cili ka tagrin të zgjedhë edhe trajnerin e ri të Italisë. Pra herë pas here… të gjitha rrugët të çojnë në Romë.
