Presidenti Ilir Meta gjatë vizitës së tij në Kosovë, është takuar dhe me ish-ambasadorin e OSBE-së, William Walker, për të cilin thotë se shqiptarët do ti jenë përjetë mirënjohës për denoncimin që i bëri masakrës së Reçakut.
Përmes një postimi në facebook, Meta shprehet se integriteti i lartë i ambasadorit vuri diplomacinë në veprim përmes Konferencës së Rambujesë, e cila u pasua me ndërhyrjen historike të NATO-s, për t’i dhënë fund përgjithmonë spastrimit etnik në zemër të Europës.
Postimi i plotë i Metës:
I lumtur të ritakohesha në Kosovë me Ambasadorin William Walker. Shqiptarët kudo në botë do t’i jenë përherë mirënjohës për denoncimin historik që i bëri Masakrës së Reçakut vetëm me tre fjalë: Krim kundër njerëzimit.
Integriteti i tij i lartë ndihmoi botën të zbulonte genocidin që ndodhte çdo ditë, dhe vuri diplomacinë në veprim përmes Konferencës së Rambujesë, dhe më pas ndërhyrjes historike të NATO-s, për t’i dhënë fund përgjithmonë spastrimit etnik në zemër të Europës.
E ftova me shumë kënaqësi për të vizituar Shqipërinë, dhe sigurisht Sarandën që ai e do aq shumë.
