Artistët e Teatrit Kombëtar janë mbledhur sot përpara godinës së Bashkisë së Tiranës, ku protestojnë per mosinformimin e procedurave të tenderit për ndërtimin e teatrit.
Artistët kërkojnë të informohen mbi tenderin e publikuar nga ana e Bashkisë së Tiranës, për ndërtimin e një godine të re.
Sipas Aleancës për Teatrin, kjo është një shkelje e rëndë ligjore dhe nëse nuk zgjidhet ata do t’i drejtohen gjykatës.
Mes protestuesve ishte dhe aktori Mehdi Malkaj, i cili tha se do të ishte më mirë që paratë që kanë ndërmend të investohen për godinën e Teatrit të shkojnë për banorët e pastrehë që mbetën pas tërmetit të 26 Nëntorit.
Duke iu përgjigjur Veliajt, që i quajti artistët çetë, Malkaj kujtoi se dhe lufta kështu nisi, me grumbullime çetash.
“Unë e kam thënë dhe e them që Teatri nxori bllof të gjithë arkitektët, hajde tërmet po thonë, dhe Teatri nuk ka pësuar asnjë dëm.
Do të ishte më mirë që zoti kryetar të ndërtonte ndonjë gjë për ata burra dhe gra që kanë nevojë sot për një strehë dhe jetojnë në të ftohtë mes çadrave.
Tani meqë ai na ka quajtur ashtu unë dua ta di se çfarë çete jemi, jemi çetë partizane, çetë zogiste, dreqi e mori, çfarë çete jemi ne, se me çeta ka filuar dhe lufta, unë ndihem mirë që jam pjesë e çetës”, u shpreh Malkaj.
Aktivistët e Aleancës për Mbrojtjen e Teatrit i kanë kërkuar që prej datës 13 Tetor informacion zyrtar Bashkisë së Tiranës për tenderin e godinës së re të Teatrit, ndërsa kjo e fundit nuk ua ka dhënë.
