Dalin detaje nga takimi që pritet të zhvillohet mes liderëve të Ballkanit Perëndimor në Shqipëri për thellimin e bashkëpunimit për përshpejtimin e “Katër lirive të BE-së”.
Në vijim të dy takimeve të mëparshme të këtij niveli, takimi i tretë rajonal do zhvillohet në datat 20-21 dhjetor 2019.
Ditën e premte, datë 20 dhjetor, ora 17.00, Kryeministri Edi Rama do të mirëpresë liderët e ftuar në një takim jozyrtar në Hotel “Rogner”, Tiranë.
Më pas, në orën 19.00, Kryeministri Edi Rama së bashku me delegacionet pjesëmarrëse do të jenë të pranishëm në Parkun Olimpik, në eventin e veçantë të bamirësisë “Ti nuk do të jesh kurrë vetëm”, dedikuar procesit të rindërtimit, pas tërmetit të 26 nëntorit.
Ditën e shtunë, datë 21dhjetor, ora 08.45, të ftuarit do të vizitojnë disa nga zonat e prekura nga tërmeti, në Durrës.
Më pas, në orën 10.00, në hotel “Rogner” do të zhvillohet “Sesioni i liderëve”.
Në orën 12.00 do të vijohet me Seancën Plenare me pjesëmarrjen e delegacioneve.
Në orën 13.15, të ditës së shtunë, aktivitetet do të përmbyllen me konferencën e përbashkët për shtyp, e cila do të zhvillohet në të njëjtin vend, në hotel Rogner, Tiranë.
