Ministrja e Mbrojtjes Olta Xhaçka ka mbajtur sot një deklaratë për mediat në lidhje me situatën në të cilën ndodhet vendi pas stuhisë që mbërtheu dje vendin. Xhaçka shprehet se janë gjithsej 105 banesa në Tiranë që janë përmbytur.
“Testuam Mbrojtjen Civile. Përmbytjet kanë sjellë fluks të madh uji. Institucionet kanë koordinuar punët për të përmirësuar situatën. OSHEE ka punuar gjatë gjithë natës, për të rregulluar disa shtylla. Banorët që janë prekur, institucionet iu janë gjendur pranë. Në qarkun e Tiranës, 105 banesa janë përmbytur. Edhe bluzat e bardha kanë bërë punë të mirë”, tha Xhaçka.
Ministrja tha se probleme ka pasur jo vetëm në Tiranë por edhe në Kamëz, Fushë Krujë, Kurbin, Lezhë e Shkodër.
“Situata pritet të normalizohet. Probleme kishte në Kamzë. Edhe në Fushë Krujë kemi pasur probleme, për shkak se në këtë zonë, disa zona administrative ka vërshime më të larta. Aktualisht ka 10 familje në Larushë dhe 8 familje në Bubq ka probleme. Lumi Ishëm ka dalë nga shtrati dhe ka rreziuar banesat e ndërtuara pranë lumit. Në Lezhë, situata është normalizuar pasi kishte përmbytje në lagjen besëlidhje. Probleme ka pasur edhe në Laç. Në qarkun Shkodër, pavarësisht reshjeve të dendura, në 5 bashkitë nuk ka probleme”, u shpreh ministrja.
Më tej ajo thekson se situata është thuajse e tejkaluar, dhe se ata janë gjithmonë pranë qytetarëve
“Problemet janë të kufizuara. Situata është thuajse e tejkaluar, por ne do jemi pranë gjithnjë të qytetarëve”, tha ministrja Xhaçka.
