Ashtu si edhe një vit më parë, finalistë të Kupës së Shqipërisë do të jenë Kukësi dhe Laçi. Verilindorët pothuajse e kishin zgjidhur gjithçka që në 90 minutëshin e parë në Vlorë, nga ku u larguan me një fitore të pastër 2-0. Ndërkohë që edhe në “Zeqir Ymeri” i njëjti rezultat, po në favor të kuksianëve, të cilët kanë shënuar fillimisht me Eminin në të 69’ dhe në të 84’ gjithçka përfundon me golin e Flores. Skuadra e drejtuar nga Duro, e cila në 9 ndeshjet e fundit ka arritur 7 fitore dhe vetëm 2 barazime është shumë e fortë për këtë Flamurtar, ekip që megjithëse herë pas here ndërtohet me shpenzime të mëdha, gjithmonë është i destinuar të shkatërrohet pa lënë asnjë gjurmë. Ndërsa Skënderbeu, megjithëse fitoi 2-1 ndeshjen e kthimit të fazës gjysmëfinale u eleminua sërish, këtë rradhë për hir të rregullit të golit në fushë kundërshtare. Progni ka zhbllokuar për vendasit në të 53’, ndërsa goli i Cetkoviç, që i dha barazimin e përkohshëm kurbinasve ishte edhe ai që i kualifikoi. Ndërkohë që në fund (79’), Plaku shënoi një gol që i shërben vetëm satistikave të arkivit të tij personal. Korçarët nuk e dëshironin këtë trofe dhe u larguan mes vërshëllimave të publikut të tyre, ndërsa finalja Kukësi – Laçi do të diskutohet në datën 22 maj në “Elbasan Arena”.
