Policia ka sekuestruar 4 makina luksoze në Laç, ndërsa policia thotë se është në kërkim edhe të 4 makinave të tjera.
Operacioni i koduar “Luksi” është zhvilluar gjatë ditës së djeshme dhe makinat i janë sekuestruar qytetarit me inicialet I. L.
Njoftimi i Policisë së Shtetit:
Sekuestrohen 4 automjete luksoze dhe po punohet për gjetjen dhe sekuestron edhe 4 automjeteve të tjera luksoze
Specialistët për Hetimin e Krimit Ekonomik e Financiar në Drejtorinë Vendore të Policisë Lezhë nën drejtimin e Prokurorisë pranë Gjykatës së Shkallës së Parë Kurbin zhvilluan Operacionin Policor “LUKSI”, për vendosjen e sekuestro preventive të disa automjeteve të shtetasit I. L.,i ekstraduar në Itali për veprat penale ‘Falsifikim i dokumenteve’ dhe ‘Grup i strukturuar kriminal’
Operacioni u zhvillua në funksion të procedimit penal të vitit 2019, regjistruar për veprën penale ‘Pastrimi i produkteve të veprës penale apo veprimtarisë kriminale ‘
Bazuar në vendimin e datës 10.07.2019, të Gjykatës së Shkallës së Parë Kurbin u vendos sekuestro preventive për katër automjete luksoze në pronësi të shtetasit I. L.
Gjithashtu po punohet për gjetjen dhe sekuestrimin edhe të katër automjeteve të tjera luksoze, të regjistruara në emra të familjarëve të shtetasit I. L.
Policia në bashkëpunim me Prokurorinë e Rrethit Gjyqësor Kurbin, po vijon punën për dokumentimin e plotë të aktivitetit të paligjshëm të këtij shtetasi, si dhe identifikimin e personave të tjerë të përfshirë.
