Vizita si një mesazh mbështetje për refugjatët sirianë dhe homazh për të mbyturit
Papa Francesku dhe Patriarku Ekumenik Bartolomeu do të vizitojnë sot së bashku ishullin grek Lesbos. Vizita që është vlerësuar si historike për krerët e dy Kishave, asaj Katolike Romane dhe asaj Ortodokse synon të përcjellë mesazhe sensibilizimi për emigrantët që e kanë ishullin si portë kalimi për në Europë. Pas vizitës në Lesbos, nga porti i Mitilinit, Ati i Shenjtë dhe kreu I kishës ortodokse do të kryejnë një lutje për qindra emigrantë që kanë humbur jetën e tyre në ujërat e Egjeut.
Papa Francesku pritet nga vetë kryeministri grek që ndodhet prej mëngjesit të sotëm në Lesbos dhe më pas do t’i shoqërojë të tre liderët fetarë në viziten e tyre në ishull. Rreth orës 13 e 45 pritet fjalimi i Papa Franceskut dhe zhvillimi i një ceremonie fetare gjatë së cilës do të hidhen kurora me lule në det. Vizita do të përfundojë rreth orës 15.00. Ngjarja mbulohet nga 400 gazetarë nga vende të ndryshme të botës.
