Ekspertë të ushtrisë, RENEA-s dhe Policisë Shkodër nxorën edhe disa mbetje të helikopterit
Ministria e Mbrojtjes dhe forcat RENA, të ndihmuar nga efektivë të policisë së Shkodrës kanë nxjerrë sot nga liqeni i Shkodrës, kutinë e zezë të helikopterit të rrëzuar dy ditë më parë.
Sipas ekspertëve, Kutia e zezë është e padëmtuar dhe po dërgohet drejt komisariatit të Shkodrës. Do të jenë ekspertë të eurocopter, kompania që ka prodhuar helikopterin e rrëzuar që do ofrojë asistencë për zbardhjen e kutisë së zezë, që pritet të hedh dritë mbi shkaqet e rrëzimit të helikopterit. Pas dërgimit provizor në komisaritin e Shkodrës, kutia e zezë e helikopterit, do të sillet me një mjet të ministrisë së Mbrojtjes, drejt Tiranës.
Prej mëngjesit e sotëm efektivët e ushtrisë, RENEA-s dhe policisë punuan për matjet e helikopterit nën një perimetër të rreptë sigurie, ku nuk ka mundur të shkelë askush përveç ekspertëve.
Operacioni për nxjerrjen e helikopterit, ka qenë i vështirë edhe për shkak të kushteve atmosferike, ndaj dhe gjatë kryerjes së matjeve, është tentuar që fillimisht të nxirret kutia e zezë dhe më pas të operohet me pjesë të tjera të mjetit të aksidentuar.
Helikopteri u rrëzua dy ditë në liqenin e Shkodrës. Për pasojë humbën jetën dy pilotë dhe u plagos rëndë një ushtar.
