Policia e Shtetit ka reaguar zyrtarisht lidhur me operacionin blic të nisur mëngjesin e sotëm në shtëpitë e tre gjyqtarëve që i zbutën vendimin Dritan Dajtit.
Pas kontrollit në banesë gjyqtari i Gjykatës së Apelit të Shkodrës, Skënder Damini është dërguar drejt policisë së Tiranës ku po merret në pyetje.
Damini, është njëri prej gjyqtarëve që kanë gjykuar dosjen e Dritan Dajtit dhe kanë vendosur heqjen e dënimit me burg përjetë dhe kthimin e tij në 25 vite burg.
Reagimi zyrtar i policisë
Duke iu përgjigjur interesimit shumë të madh të medias, Policia e Shtetit konfirmon aksionin e ndërmarrë nga forcat speciale, në zbatim të urdhrit nr. 89, datë 14 shkurt 2019, të Gjykatës së Shkallës së Parë për Krime të Rënda, për të ushtruar kontroll në banesat e tre gjyqtarëve, të cilët zbutën dënimin e Dritan Dajtit.
Operacioni policor vazhdon edhe në këto momente, por mund të konfirmojmë se deri tani janë gjetur një sasi municioni, mijëra euro dhe prova të tjera, të cilat do të administrohen nga organet ligjzbatuese.
Në përfundim të operacionit, Policia e Shtetit do të ketë një komunikim të veçantë me median dhe publikun.
