Një grup studentësh dhe pedagogësh kanë qenë sot përpara kryeministrisë, teksa i kanë dërguar kryeministrit Edi Rama disa kartolina, ku shkruheshin kërkesat që janë artikuluar në gjithë këto ditë protestash.
Të ftuar në studion e lajmeve të Fax News Ilirjana Kuçana, pedagoge dhe Don Pjetri, student, kanë treguar se në gjithë këto ditë festash, ata në mënyrë simbolike do të protestojnë përpara zyrës së Ramës.
“Në kartolina ishin të shkruara kërkesat tona, meqë kryeministri është artist ne do të protestojmë si të tillë. Kjo do të jetë forma jonë e protestës deri në datën 4 Janar kur të kthehen protestat masive. Ne jemi pro paqes dhe kështu do të qëndrojmë deri në fund”, u shpreh Pjetri.
Ndërkohë që mbështetjen e saj të pareshtur ndaj studentëve e shprehu dhe Kuçana, e cila tha se çdo vendim që do të marrin studentët do të jetë i drejtë.
‘’Dialogun nuk e vendos unë, sa kohë që ata do të jenë në protestë unë do të jem në krah të tyre, çdo ditë. 9 pikat e studentëve janë të qarta, dhe ata këmbëngulin deri në plotësimin e tyre”, tha Kuçana.
Ndërkohë Pjetri u shpreh më tej: Pika e nëntë iu takon personave të verbër, dhe me aftësi të kufizuar. Dialogu është i shpikur nga ana e kryeministrit. 5 % e GDP-së ka qenë premtimi tij në zgjedhje, tani thotë që nuk paska mundësi për ne. Të plotësojë kërkesat në mënyrë që të rikthehet puna në auditore.
Presidenti duhet falenderuar nga ana jonë që ktheu pas Buxhetin duke i dhënë një mundësi të dytë qeverisë, për të shtuar fondet për arsimin.
Kuçana u shpreh se në Janar nëse studentët vendosin që të mos paguajnë tarifat do të sillte një krizë financiare për çdo universitet.
“Nëse studentët në Janar nuk do të paguajnë tarifat, atëherë i gjithë arsimi i lartë do të futet në kolaps. Në shesh do të dalin edhe pedagogët pasi nuk do të ketë mundësi financiare që ata të paguajnë.
Reforma që u krye nga ana e Ministrisë është e dështuar, nuk kanë dalë akoma despozitat ligjore. Kryeministri duhet ta pranojë këtë dështim.
Unë mendoj se çdokush që e ndjen veten student, edhe anëtar i forumeve duhet të jetë aty. Po përfshihen studentët dhe jo partitë, kauza jonë është e drejtë dhe ne për këtë do të luftojmë deri në fund”, u shpreh Kuçana.
Pjetri dhe Kuçana u shprehën se në Janar protesta do të intesifikohet duke paralizuar të gjithë vendin./Faxweb
