“Për PS s’ka rëndësi rezultati por pjesëmarrja. Referendumi është ushtrim demokratik që i ben mirë PS-së e Shqipërise”
Kryetari i grupit parlamentar të PS-së Taulant Balla, u takua sot në Pogradec me strukturat drejtuese të PS ku bëri thirrje për pjesëmarrje në referendum. Sipas Taulant Ballës, demokracia në PS po arrin kulmin me këtë referendum duke vecuar se Rama është I dyti pas kushtetutës që po kalon në referendum.
“Ky referendum është i rëndësishëm për demokracinë në vendin tonë. Kongresi vendosi që përmes këtij referendumi të votojë antarësia, ndaj është e rëndësishme që çdo socialist në Pogradec dhe gjithë Shqipërinë të marrë pjesë në datën 9 në referendum. Në Shqipëri vetëm Kushtetuta ka kaluar në referendum. Shembulli që po jep PS duhet të motivojë socialistët të marrin pjesë. Për PS s’ka rëndësi rezultati, por ka rëndësi pjesemarrja. Është ushtrim demokratik që i ben mirë PS e Shqipërise. S’ka asnjë parti tjetër që diskuton statutin, pasi ne kemi statut dhe të tjerët nuk kanë”, tha Balla.
Socialistët do t’i përgjigjen të shtunën pyetjes : “Kur partia Socialiste është në qeveri dhe kryetari i saj është kryeministër a konsiderohet i rinovuar automatikisht mandati i kryetarit”?. Rama e kërkoi referendumin pas akuzave të Ben Blushit se ishte shkelur statute i partisë.
