Pas një konflikti për shkaqe xhelozie, Admir Dervishi një punonjës i Gardës së Republikës, 29 vjeç ka vrarë bashkëshorten e tij Ilda Dervishi, 28 vjeç. Kështu njoftoi policia për ngjarjen e rëndë që ndodhi mëngjesin e sotëm në kryeqytet. Krimi është kryer brenda banesës së çiftit që jetonte me qira tek pallatet Derveni në Rrugën e Qelqit në Kombinat.
Mësohet se çifti ka dy fëmijë, djalin 4 vjeç dhe vajzën 8 muajshe. Fqinjët i kanë thënë policisë se ngjarja ka ndodhur rreth orës 07:10, dhe se ata kishin dëgjuar të qarat e fëmijës. Sipas të dhënave të policisë Ilda është përpjekur të dalë nga shtëpia, në momentin kur nisi sherri. Ajo ka qenë pranë derës, kur gardisti ka qëlluar me 4 plumba. Dy plumba e kanë marrë në trup, në pjesën e kraharorit, ndërsa dy të tjerë përfunduan në derë. Ndërkohë, pasi ka kryer aktin bashkëshorti i ka çuar fëmijët tek gjitonët, ndërsa viktima, ende në gjendje të plagosur, është dërguar në Qëndrën Spitalore Nënë Tereza, ku ka ndërruar jetë pas një ore.
Policia ka arrestuar Admir Dervishin, i cili ka qenë në gjendje shoku dhe nuk ka bërë asnjë rezistencë.
