I ftuar në studion e Fax News për të dhënë një këndvështrim të tij rreth protestës së sotme të studentëve përpara mInistrisë së Arsimit, Edmond Tupja tha se studentët duhet të krijojnë një sindikatë kombëtare të pavarur studentore.
Sipas tij nuk është i saktë artikulimi që bëhet shpesh duke e quajtur rininë si ardhmja, pasi ajo – tha Tupja – “është e tashmja që lufton dhe punon sot për të ardhmen. Prandaj ftoj të gjithë ata që iu besojnë kauzave të drejta t’iu bashkohen studentëve. Protesta e sotme nga studentët ishte e drejtë dhe i ftoj që të mos e ndërpresin sepse kështu është shembur edhe sistemi diktatorial në fillim të viteve 90-të.”
Shkrimtari i njohur tha se duhet të krijohen marrëdhënie të qëndrueshme midis sindikatave dhe qeverisë sepse vjen një kohë kur populli ynë i “urtë” të zgjohet dhe këtë e bëjnë studentët.
“Premtimët në Shqipëri bëhen falas, por në qoftë se nga 10 premtime sikur 7 të mbahen, ky sërish mbetet një premtim i pambajtur. Përballë kësaj politike-politikane, politikanët luajnë lojën e tyre e cila nuk është transparente. Arsimi duhet të jetë falas, për mua kjo që u bëhet studentëve është grabitje. Qëllimi i qeverisë aktuale siç duket është t’i dëbojë studentët. Në qoftë se taktika e qeverisë është të përzër shqiptarët, natyrisht që edhe nga Bangladeshi do të vijnë njerëz të punojnë këtu. Do të mbetet një grup i vogël të lumturish me ca skllevër,” – u shpreh Tupja.
Ai tha gjithashtu se kryeministri mund të bëjë turizëm por shtresa e mesme dhe shtresa e varfër e të rinjëve nuk bëjnë dot turizëm, ata duhet të arsimohen.
“Studentët nuk janë gurë shahu as robotë as të klonuar, janë njerëz me ndjenja, kanë një atdhe. Qeveria kërkon t’jua neveris këtë vend shqiptarëve, dhe atdheu është në rrezik në kuptimin më njerëzor të fjalës. Ai kobziu në krye të qeverisë të shikojë vendin e tij, situatën në të cilën ndodhet. Studentët besoj t’a kenë kuptuar se nuk duhet patur besim tek kjo qeveri, premtimet që iu bëhen nuk do të mbahen kurrë. Politika është arti i të mashtruarit e cila është bërë logorre, që do të thotë fjalë të kthyera në diarre,” – tha Tupja.
Duke folur edhe rreth asaj që po ndodh me banorët e Unazës së Re dhe të Shkozës, Tupja tha se ndryshe nga premtimet që iu bënë në opozitë tani i flakin në rrugë pronarët e shtëpive të palgalizuara.
“Ne nuk jemi milet, e kemi lakun tek fyti ku një pakicë pasurohet paturpësisht dhe shumica dërrmuese jeton me ankthin ekzistencial,” – u shpreh shkrimtari.
Sipas Tupes, proverbi latin përça e sundo funksionon tek ne sepse jemi individualistë dhe për rrjedhojë protestojmë sipas rastit atëherë kur na vjen problemi tek vetja.
Ai shtoi se kjo nuk do të thotë se jemi një popull që dorëzohemi apo asimilohemi lehtë.
“Duhet të bashkohemi në mënyrë të vetëdijshme. Për këtë ju bëj thirje studentëve ta bashkojnë lëvizjen e tyre dhe të krijojnë një sindikatë të pavarur studentore shqiptare. Kujtojmë se kur u protestua në 2004 qeveria u detyrua të bëjë lëshime. Ndaj për këtë studentët duhet të organizohen sepse nuk duhet të kenë frikë nga kryeministri dhe ministrja por kryeministri dhe ministrja të kenë frikë nga studentët,” u shpreh Tupja.
Shkrimtari shprehu keqardhjen e tij për pedagogët që nuk i janë bashkuar studentëve në protestë.
Tupja tha se studentet po na japin shembullin më të mirë të gjithëve.
https://www.faxweb.al/protesta-perpara-ministrise-se-arsimit-tupja-studentet-nuk-jane-gure-shahu/
