Kryebashkiaku Erion Veliaj ka marrë pjesë në ceremoninë e zhvilluar me rastin e 17 Nëntorit, ditës së Çlirimit të kryeqytetit.
Sot, Tirana nuk rrezikohet nga askush “përveç nesh”, theksoi Veliaj, i cili kërkoi nga të gjithë që të reflektojnë një moment se çfarë mund të bëjmë për mirë.
Veliaj tha se edhe 74 vjet më parë kishte një minorancë të zhurmshme e cila thoshte se është më mirë të bashkëpunonin me fashizmin, por shumica morale e Tiranës vendosi të vetëçlirohej nga pushtuesi falë inkurajimit dhe mbështetjes popullore nga qytetarët e Tiranës.
“Hera e parafundit që u dogjën goma në derën e Bashkisë së Tiranës ishte 17 nëntor 1944, kur trupat që po largoheshin dogjën qytetin dhe shkaktuan dëmet e fundit që mund t’i bënin Tiranës. Hera e fundit që u dogjën goma para Bashkisë së Tiranës ishte pardje, pas 74 vitesh, jo nga armiku, jo nga pushtuesi, jo nga zaptuesi, por nga ne vetë”, deklaroi ai.
