Eshtë e rrallë të bashkohen të gjitha në mishin dhe shpirtin e një njeriu, për të detyruar ta cilësosh më pas ikonë, legjendë, apo me çfarëdo lloj fjale të madhe që të vjen nëpër mend. Ky është Fatmir Frashëri, që sot 75 vjeç, ndërkohë që 50 vite i ka shpenzuar për futbollin. Kampion i madh në fushë dhe më pas në pankinë, si drejtues i Tiranës, por edhe i Dinamos. Por kampion edhe jashtë ambjenteve sportive, nga ata që ia vlente ta pyesje sa herë që ishe i paqartë. Kështu që nuk ishte futbolli që e bëri të madh, por pikërisht ai i dha kuptim këtij sporti si rrallëkush, aq sa imponoi të kundërtën e mendimit, se ishte e pamundur të kaloje më shumë se gjysmën e ditës i veshur vetëm me të mbathura dhe të njëjtën kohë të ishte intelektual. Sot është 75 dhe të vjen keq që edhe për njerëz të tillë vjen një kohë që futbollin mund ta ndjekin vetëm nga ekrani i televizorit.
