Marsin e tre viteve më parë, organizatat ndërkombëtare e vendosnin në 20 000 numrin e femrave të përdhunuara në Kosovë gjatë periudhës së konfliktit nga paraushtarakët serbë.
Të paktën deri më tani, kur një grua, Vasfije Krasniqi Goodman, vendosi të thyejë tabutë e ta rrëfejë publikisht ndodhinë e shndërruar në një barrë tepër të madhe për ta mbajtur vetëm gjithë jetën.
36-vjeçarja jeton sot në Teksas të Shteteve të Bashkuara. Kur ishte vetëm 16 vjeç, Vasfija u përdhunua nga dy serbë, njëri prej të cilëve polic i regjimit të Sllobodan Millosheviçit. Në rrëfimin rrënqethës, gruaja e ka të pamundur t’i mbajë lotët, si për të treguar kështu se ajo ngjarje e ka shenjuar përjetë dhe se çfarë lufte i është dashur të bëjë me veten për të hedhur një hap kaq të guximshëm.
Vasfija shpjegon në detaje si e morën nga shtëpia nën kërcënimin e armëve, si kishte dashur aq shumë të vdiste në ato momente dhe përse polici serb nuk e vrau.
“E ka pasur dorën të lidhur, dorën e majtë. Ai thoshte: “Ja, këtë ma kanë bërë babai dhe vëllezërit e tu dhe tani do ta paguash ti”. Unë doja vetëm që të më vriste”, tregon gruaja.
Vitin e kaluar, Vasfija pati publikuar në faqen e saj në Facebook një letër të hapur për njeriun që e përdhunoi, ndërsa kjo ishte hera e parë që rrëfehej publikisht në televizion. Arsyeja që e shtyu drejt këtij veprimi ishte dëshira për të fuqizuar gratë e tjera, e duke e bërë këtë, u shndërrua dhe vetë në një shembull guximi dhe shprese.
“I lutsha mem vra, dojsha me një plumb mem vra. Erdhën në shtëpi, morën letërnjoftimet e familjarëve dhe unë aty e kuptova që diçka ka me ndodhë me mu. Dojsha mem vra po polici thoshte se kshtu hjek ma shumë, nëse më dhunon e më torturon”, tregoi mes tjerash Vasfije Krasniqi.
