Nga Avni Nezaj
Nuk është çudi, e pse duhet të jëtë, që pas pak ditësh ose mujash Edi Rama që është kryeministër i këtij vendi të mos jetë më në këtë post. Dhe nuk është çudi që ai me kurajo e vetëmohim të dalë studiove televizive dhe të thotë se “Rilindja” ishte një qeverisje e mrekullueshme e paparë, e magjishme, e pa kazan, e pa orgji, e pa… e pa pikën e faqeskuqjes të thotë që fajtori për dertin, ku janë shqiptarët sot është dikush tjetër që nuk ka lidhje me Rilindjen…. Pra, të mbrojë “Grup”-in. Flet ai me shumë se ata që e akuzojnë, sepse është mënyrë më e mirë që të hutohen ata që gjykojnë edhe me votë…
Çudi do të ishte po të ndodhte ndryshe, pasi është e sigurtë që pronarët e mediave që i shërbyen, po i shërbejnë edhe mund t’i shërbejnë edhe disa ditë, javë apo muaj pasi do të ketë ikur nga karrigia rrotulluese e kreut të qeverisë.
“Rilindja” lindi si formacion që do të linte në hije Partinë Socialiste dhe imazhin e saj liberal që i dha Fatos Nano. Duket sa ia arriti qëllimit. Të gjithë që ishin personazhe të asaj partie tani janë vetëm hije të rilindasëve të rinj, ose buzëqeshës herë të paguar e herë jo, të këtij grupi të ri politik që edhe qeveris akoma.
Erdhën në pushtet me formulën se fajin e ka Berisha e do të ikin nga pushteti prapë me formulën e zakonshme se fajin e ka Berisha. Formulë që u injektua tek Rama dhe gjithëpërfshirësit e tij në “Grup”, nga njerëzit e medias që i kishin shërbyer me zell Berishës dhe politikave të tij edhe duke qenë në “Grup”-in e Ramës.
Rilndja, tashmë e kthyer në “Grup”, nëse nuk kishte lindur e tillë, asnjëherë nuk i sherbeu shtetit. Vetëm partisë i sherbeu, pra “Rilindjes”. E pra, për rrjedhojë u bë Vetëshërbim i “Grup”-it të tyre, pjestarë të të cilit janë deputetë e halabakë, biznesmenë e gjobëvënës, gazetarë, anal-istë e burgaxhinj, politologë e taksixhinj.
Emrat dhe fytyrat i shikojmë përditë në mediat e ngjyrosura me shirtin e ylbertë të Sorosit e deri tek manjatët mediatikë të tenderave qeveritare. Një telenovelë e madhe që inicion vjedhjen e parave publike, që e reklamon vjedhjen si të mirë dhe nëse dikush guxon e thotë të kundërten denigrohet në grup, nga “Grupi”.
Pra, nëse u referohemi fakteve të kopjuara nga ajo mbledhja e famshme e PS, ku drejtuesit shfaqin besnikërinë për partinë dhe liderin, mendoj se asgjë nuk ka ndryshuar, veçse këta që qeverisin nuk kanë më një parti nga mbrapa pasi e kanë shkatërruar atë, por kanë nga mbrapa “Rilindjen” ose “Grup”-in dhe atdheun e kanë harruar që e kanë harruar.
E kjo është e frikshme pasi “Grup”-i është një strukturë me kokë e këmbë të përlyer nga krimi e korrupsioni në para të pista dhe trafiqet të droges e të çfarë të mundet…
Drejtues të lartë të Rilindjes tashmë janë akuzuar për lidhje me drogën, ministri Xhafaj, ish-ministri Tahiri, deputetë të qarqeve te ndryshme, numri dy i PS Balla udhëton pa i bërë syri tërr me charter me persona të dënuar për trafik droge, thotë opozita.
Ky realisht nuk është përfaqësim politik në një vend normal e për një vend normal. Sepse, imagjinojeni ju që në Francë numri dy i partisë së Makronit të udhëtojë me charter me një të dënuar për trafik droge. Bie shteti për 5 minuta.
Por, në Shqipëri “Grup”-i është i fuqishëm ka kapur edhe mediat e njerëzit, hanë bukë, e heshtin.
Imagjinojeni ju që në Gjermani të ketë një ministër të Brendshëm që akuzohet nga opozita për lidhje me trafikun e drogës e të vazhdojë të rrijë në detyrë. Kurrë nuk mund të ndodhë!
Imagjinojeni ju, nëse një deputet zbulohet se ka bërë trafik droge apo prostitucioni e qesëndis në krah të kryeminstrit në fushatë apo në parlament, në një vend europian do plaste lufta civile…
Faktet janë kokëforta duke na bindur plotësisht se “Rilindja” erdhi si formacion politik që do të shkatërronte Partinë Socialiste dhe avash-avash e nxori kokën si një “Grup” që po merr në qafë Shqipërinë.
E opozita ka një mision të madh e shumë të vështirë të luftojë e të përballet me këtë lloj “Rilindje” që ka formën dhe strukturën e “Grup”-it. Duhet mbështetur maksimalisht në inisiativat e saj për çlirimin e realitetit qeverisës e përfaqësues nga ata që duan më shumë partinë, “Grup”-in se atdheun.
Edhe fati i Rilindjes pasi nuk i dha kurgja Shqipërisë do të shkojë si, ajo fraza e bukur në qytetin që mbajti gjallë kulturën shqiptare. Në Shkodër ka pas qenë një shprehje edhe pa humor, “Ça kena Grup?”. “Ça kena Saimir?”, “Ça kena Ditmir?”, “Ça kena, Fatmir?”, “Ça kena Damian?” e të tjerë… të “mirë” të tjerë të këtij “Grup”-i.
Rilindja lindi si formacion qeverisës e politik e po ikën si “Grup”.
https://www.syri.net/op-ed/202328/fati-i-rilindjes-ose-ca-kena-grup/
