Guvernatori i BSH, raporton në Komisionin e Ekonomisë
Ulja e kredisë me probleme është rruga e vetme për të nxitur kreditimin në ekonomi. Kështu deklaroi Guvernatori i Bankës së Shqipërisë Genti Sejko gjatë raportimit vjetor në Komisionin Parlamentar të Ekonomisë. Sejko tha se gjatë 2015 kredia me probleme ra nga 25 për qind në 18 për qind dhe kjo sipas tij u bë e mundur me fshirjen nga bilancet e bankave të kredive pa shpresë kthimi, si edhe me ristrukturime të kredive me kompanitë e mëdha. Sipas Sejkos një ndihmesë tjetër në këtë drejtim do të japë edhe miratimi i ligjit të falimentit. “Miratimi i Ligjit të Falimentit do të ishte një ndihmesë e madhe për të vazhduar me ristrukturimin e kredive me problem. Në këtë mënyrë i hapet edhe më shumë mundësi kreditimit të ekonomisë, i cili siç e dimë edhe pse me rritje vijon të jetë poshtë potencialit të vet”, deklaroi Sejko.
I pyetur për falimentin e kompanive të mëdha si ARMO e Kurum, Sejko tha se nuk ka ndonjë situatë shqetësuese për bankat. Megjithatë, sipas tij, një faliment i mundshëm i KURUM do ta rriste me 1 për qind kredinë me probleme.
Ndërkohë duke folur për ndikimet direkte të Bankës Qëndrore në ekonominë e vendit Sejko tha se ka ende hapësira për të ulur normën bazë të interesit.
