Adoleshentët amerikanë dhe jo vetëm, po braktisin “Facebook”-un, duke preferuar platforma të tjera sociale si “Youtube”, “Instagram” apo “Snapchat”.
Ky është konkluzioni i një studimi të kryer nga Qendra e Kërkimeve “Pew” me seli në SHBA, sipas së cilës vetëm 51% e tyre përdorin tashmë rrjetin social të themeluar nga Zuckerberg, një shifër që ka pësuar rënie me 20% prej vitit 2015, kur u anketuan për herë të fundit adoleshentët.
“Youtube” ka “vjedhur” dominimin e dikurshëm të “Facebook”-ut mbi adoleshentët, me 85% të tyre që preferojnë tashmë platformën e publikimit të videove. Rrjetet e dyta dhe të treta për nga interesi mes adoleshentëve, sipas këtij studimi janë “Instagram”-i me 72% dhe “Snapchat”-i me 69%.
Numri i adoleshentëve që përdorin “Twitter”-in është vetëm 32%, ndërsa “Tumblr” ka edhe më pak frekuentues 14%.
