Ju që jeni të lirë, e ju që gojën keni mbyllur, e duart I mbani lidhur në prangat e Kryeministrit, demokracia në Shqipëri është në rrezik!
Sot, në Shqipëri gazetarët dhunohen!
Sot, në Shqipëri media nuk është e lirë!
Sot, në këtë sallë, nuk mund të flitet për asgjë tjetër, veçse për dhunën e urdhëruar, targetuat ndaj kryeredaktorit të gazetës së parë e më të madhe opozitare, z. Bledi Kasmi.
Sot, kjo seancë plenare duhet t’ju dedikohet rojtarëve të së vërtetës, gazetarëve dhe punonjësve të medias, të cilët çdo ditë shantazhohen, intimidohen dhe dhunohen, si të ishin në Republikën Mafioze të Don Edvin Ramës.
Gazetarët që i zbuluan korrupsionin shtetëror dhe lidhjet e tij me krimin e organizuar, janë vënë në shënjestër dhe përballë kësaj ushtrie të së vërtetës Rama ka lëshuar kriminelë e zyrtarë servilë e të korruptuar për të kryer vepra kriminale mbi ta.
Mosdistancimi nga dhuna i Kryemininstrit Rama dhe ministrit të Brendshëm Xhafaj vërtetojnë që ishin ata urdhëruesit e sulmit. Por edhe më absurde është heshtja e deputetëve të mazhorancës, edhe të atyre që janë në komisionin për çështje të medias…
Refuzimi për të firmosur deklaratën e propozuar nga deputetët e opozitës në Komisionin për median për të dënuar dhunën policore ndaj gazetarit Blendi Kasmi tregon se sa e lirë është Shqipëria… Deputetët e opozitës në Komisionin Parlamentar të Edukimit dhe Mjeteve të Informimit Publik dënojnë dhunën policore ndaj Bledi Kasmit, kryeredaktorit të “RilindjesDemokratike”.
Kryeredaktori Kasmi u godit qëllimisht me shkop hekuri në kokë, me një sulm të urdhëruar, të targetuar, ku mori edhe plagë të thellë në kokë. Fatmirësisht, pas ndihmës së parë mjekësore dhe më pas ndërhyrjes së specializuar në Spitalin e Traumës, me dhjetë qepje në kokë, Kasmi i shpëtoi rrezikut për jetën dhe gjymtimeve. Kjo ngjarje e rëndë u tentua të manipulohej me skema që edhe policia sekrete e Enver Hoxhës do ja kishte zili. Me urdhër të Ramës, Drejtori i Policisë tentoi të shantazhonte mjekët për të ndryshuar raportin mjekësor. Ndërkohë, po nga zyra e Kryeministrit mediat pranë tij urdhëroheshintë sulmonin kolegun e tyre të përgjakur, me komente jashtë çdo etike profesionale dhe ndjenje humanizmi. Por, kur njeriun frika e merr peng, mendon se të gjithë futen në bunker si ai vetë. Kjo është arsyeja që kryeministri ynë, frikacak sulmon gjthkënd, ndër ata që kanë, veç një armë, TË VËRTETËN!!!
Kundërshtarët e tij më të mëdhenj, janë ata që i japin zë të vertetës, mes tyre edhe gazetarët.
Një pjesë tenton t’i lajkatojë, të tjerët t’í blejë. E ata që nuk blen dot, i kërcënon e i shantazhon, i fyen, i quan “kazan” dhe kur ata nuk binden, i dhunon si në rastin e Bledi Kasmit, kryeredaktorit të Rilindjes Demokratike, me një karrierë çerekshekullore në gazetari, një gazetar i talentuar dhe një rojtar i së vërtetës!
Ne, deputetët e komisionit parlamentar përgjegjës për çështjet e mediave në vëmendje të këtij rasti të rëndë dhe duke vlerësuar rëndësinë e medias së lirë dhe të pavaruar, kërkojmë:
- Thirrjen me urgjencë të një seance dëgjimore me kryeredaktorin e Gazetës “RilindjaDemokratike”, Bledi Kasmi, ditën e hënë në 4 qershor 2018
- Zbardhjen me përparësitë kësaj ngjarje të rëndë për Lirinë e Shtypit dhe sigurinë e jetës së gazetarëve
- I bëjmë thirrje Kryeministrit Edi Rama dhe ministrit të Brendshëm Fatmir Xhafaj të dënojnë dhunën policore ndaj kryeredaktorit të gazetës opozitare, Bledi Kasmi dhe të distancohen nga çdo akt dhune, shantazhi dhe intimidimi që iu bëhen gazetarëve dhe punonjësve të medias
Të nderuar kolegë deputetë,
Në një vend që është në pritje të një vendimi për hapjen e negociatave, dhuna ndaj gazetarëve, ndaj mediave, është e papranueshme. Johannes Hahn, në konferencën zhvilluar në Tiranë: “BE – Ballkani Perëndimor, Ditët e Medias” në 10 nëntor 2017 deklaroi: “Liria e shprehjes është një nga elementët kyҫ të procesit tonë të integrimit, të hapjes së negociatave për pranimin e vendeve kandidate në BE.
Të nderuar qytetarë,
Frika e këtij njeriu e shtyn që të mundohet të zhbëjë të tjerët, t’i dhunojë, mundësisht t’i zhdukë, ose të përhapë terror me arrestime e dhunë policore.
Mirë i ka bërë llogaritë, por ka vetëm një gabim të vogël në llogaritje. Jo të gjithë kanë frikë dhe mes gazetarëve ka plot të tillë. Nuk ua mbyll dot gojën me dhunë as Bledit, as të tjerëve.
Përshëndesim deklaratën e “Reporterëve pa Kufij” dhe Shoqatës së Gazetarëve Profesionistë, të cilët dënuan dhunën dhe u solidarizuan me gazetarin BlediKasmi. Kërkojmë që këtij solidarizimi t’i bashkohen edhe Institucionet Europiane dhe Organizatat Ndërkombëtare që mbrojnë Lirinë e Shtypit dhe të drejtat e gazetarëve.
Në cilësinë e deputetëve anëtarë të Komisionit Parlamentar që mbulojnë fushën e medias do të kërkojmë që Shqipëria, si vend anëtar në OKB të mbështesë nismën e “Reporterëve pa Kufij” për të emëruar një përfaqësues të posaçëm në Kombet e Bashkuara për sigurinë e gazetarëve.
