Trajneri Zinedine Zidane ka publikuar sot listën e lojtarëve që ka grumbulluar për ndeshjen ndaj Barcelonës, në “El Clasico” që do të luhet në “Camp Nou”. Francezi ka grumbulluar 19 lojtarë, ndërkohë që bie në sy mungesa e Isco dhe Dani Carvajal, që për arsye dëmtimi nuk do të jenë në fushë në këtë përballje të rëndësishme. Carvajal u dëmtua në ndeshjen që madrilenët zhvilluan ndaj Bayern Mynih, në gjysmëfinalet e Champions League. Edhe pse pritej që ai të rikuperonte për këtë sfidë, nuk ia ka dalë mbanë të jetë në fushë.
Carvajal pritet të jetë në dispozicion të Zidane për finalen e Champions League ndaj Liverpool, ndërkohë që edhe Isco nuk do të jetë në fushë, për shkak të dëmtimit, por që pritet të rikuperojë për finalen e Champions (Isco është stërvitur ditët e fundit, pas një problemi në shpatull). Trajneri francez nuk dëshiron të rrezikojë me këta lojtarë duke i aktivizuar në këtë sfidë, duke qenë se titulli në La Liga është një çështje e mbyllur.
Në dyshim ka qenë edhe Raphael Varane, që ka patur një dëmtim në kavilje dhe nuk është stërvitur në dy javët e fundit, por Zidane ka vendosur ta grumbullojë qendërmbrojtësin. Zidane pat lënë disa lojtarë pushim në ndeshjen e dytë gjysmëfinale të Champions League ndaj Bayern, pikërisht që të ketë një ekip më të freskët në këtë përballje ndaj Barcelonës, që e ka fituar që një javë më parë titullin kampion.
