U duk se Bayern Munchen do të thyhej përsëri pas eliminimit nga Champions League, por kampionët e Bundesligës për të 6-n herë radhazi nuk e kanë ndalur ritmin edhe në javën e parafundit. Bayern Munchen ka përmbysur shifrat nga 1-0 në 1-3 përballë Koln, në ndeshjen e luajtur në fushën e të fundit.
Sule në minutën e 30-të shënoi autogol dhe Koln e mbylli pjesën e parë në avantazhin 1-0. Në të dytë, James Rodriguez barazoi shifrat në 1-1 në minutën e 59-të. Dy minuta më pas Lewandowski shënon golin e dytë dhe të avantazhit për miqtë. Ishte goli i 29-të për polakun, që edhe këtë vit në Bundesligë shpallet shënuesi më i mirë, teksa ndodhet 3 gola më pak se Messi në Europë.
Për të kompletuar fitoren, mendon Tolisso, që në minutën e 78-të shënon edhe golin e sigurisë. Mbyllet 1-3, me Bayern Munchen që tani e ka mendjen vetëm te finalja e Kupës së Gjermanisë, atë me Eintracht Frankfurt.
Ndërkohë, Dortmund edhe njëherë tjetër ka treguar se ky nuk ishte sezoni i tij. Verdhezinjtë kanë humbur 1-2 në shtëpi me Mainz dhe mbeten në vend të tretë.
