Herdi Prenga, nga Kroacia te kuqezinjtë, në gjurmët e të atit

Në listën e shpallur këtë të premte nga trajneri italian i Kombëtares shqiptare të futbollit, Christian Panucci, binte në sy edhe një tjetër emër që grumbullohet për herë të parë. Ai është Herdi Prenga, qendërmbrojtësi 23-vjeçar i ekipit kroat, Inter Zapresiç.

Prenga është lindur në Zadar të Kroacisë nga prindër shqiptarë me origjinë nga Mirdita. Babai i tij, Besniku ka qenë gjithashtu futbollist i kombëtares kuqezi në vitet 1992-1994. Djali i tij e ka nisur karrierën tek akademia e Dinamos së Zagrebit, klubit më të shquar kroat, ndërsa në vitin 2013 firmosi të parën kontratë profesioniste për klubin kryeqytetas. Prenga është 1.89 m i gjatë, ka këmbë të preferuar të djathtën.

Dy vitet e para si futbollist profesionist i kaloi në formë huazimi te Sesvete dhe Lokomotiva e Zagrebit, me këtë të fundit që do ta blinte përfundimisht në vitin 2017 nga rivalët kryeqytetas. Por pas dy sezonesh me këtë ekip, Prenga do të largohej për te Inter Zapresiç.

Sa i përket karrierës ndërkombëtare, Prenga u grumbullua filimisht me Kombëtaren kroate të U17-s, duke luajtur në raundin “elitë” të Europianit të vitit 2011. Pasi luajti çdo ndeshje të atij edicioni u thirr nga trajneri Dinko Jeliçiç me përfaqësuesen e moshave U19, për të luajtur në kualifikueset europiane të kësaj grupmoshe. Ngjitja e tij do të vijonte me Kroacinë U21, i thirrur nga trajneri Nenad Graçan, por pa luajtur.

Në janar të vitit 2015, Prenga do të shprehte për mediet shqiptare dëshirën e tij për të ndjekur gjurmët e të atit, Besnik Prenga, duke veshur fanellën kuqezi, pasi do të ishte një nder për të.