Nga Elsa Vorfi
Leta, Arta dhe Lumja, janë tre të moshuara nga fshatra të Tiranës, që mëngjes për mëngjes rreshtojnë produktet e tyre të fshatit diku tek rruga e Kavajës. Janë të moshuara, diku tek 70 vite duket që mbajne mbi supe, shami borë të bardha mbajnë në kokë, të qeshura e entuziaste më duken sa herë që i shoh, njëra prej tyre është pak më pak e tillë, rri ashtu e heshtur.
Iu kalova pranë dhe sot, pikërisht sot per 8 mars. Ishin ende aty, të përkulura pranë produkteve të tyre, duke u munduar t’i rregullonin sa më mirë për t’i shërbyer me përulesi ekstreme çdo klienti që afrohet tek produktet e tyre.
Pranë tyre kalojnë furishëm zonja të parfumosura, “zonja 8 Marsi shqiptar”. Tërheqin vemendjen e të moshuarave që I shohin gjithë kuriozitet. Për një moment njëra prej të moshuarave i thotë dy të tjerave : “ Është 8 marsi oj gra, po dalin me festu gratë”. -Aaaaaa, iu përgjigj tjetra, as s’më ka shku menja hiç”.
Si duket vetëm njëra prej të moshuarave e dinte që sot shënon data 8 Mars e fliste për festën e gruas si për një gjë kështu të jashtme, që nuk i perket asaj, që iu përket të tjerave gra. Punët e përditshme të fshatit, dita e filluar herët, si duket ka bërë që të moshuarat të humbin sensin e ditëve, datave.
Buqeta me lule iu kalojnë përpara syve. – “Ooooo, ne kemi lule atje në katun sa të dum, lloj-llojshe, ngjyra-ngjyra, këto janë lule artificiale oj nan”, flisnin të moshuarat teksa shikonin zonja me lule qe iu kalonin pranë. Kshu në pamje të pare situata është komike, ama t’i shohësh të vëna përballë si me qëllim dy eksteme të tilla në një dite 8 marsi, të bën shumë të mendosh.
“A e di që s’po me bje hiç nërmen për lule, po më bje n’men se po më dhem kaptina, po më dhemin kockat, po më dhemin kamt, të kisha me ba një vizitë krejt trupit mirë do me bante”, foli e ajo e moshuara qe ishte më e heshtur që në fillim. Foli, foli për të thënë atë të do duhej ta dëgjonin të gjithë. E me atë qe tha, të bënte të mendoje se dhurata më e mirë që mund t’i bëhej të moshuares në këtë ditë 8 Marsi, ishte një kontroll shëndetësor, nevoja ia bërtiste.
Ne një ditë të tillë që lindi si një ditë proteste, por e kemi zhvilluar si një ditë feste, ku konsumizmi është i madh, Leta, Arta dhe Lumja, të kthejnë me kembë në tokë… Janë gra të tilla që përfaqësojnë shumë gra të tjera shqiptare. Janë gra të tilla që zbehin komplet fjalimet e deklaratat publike për gruan, janë gra të tilla prej të cilave duhet mësuar shumë e për të cilat duhet bërë shumë.
