Rritet tensioni në prag të derbit të Torinos, që do të luhet nesën në orën 15:00. Mbrëmë në orët e vona të natës është përfshirë nga flakën një bar në rrugën “Filadelfia”, që njihet edhe si bastioni historik i tifozëve “granata”, qw ndodhet pikërisht përballë stadiumit “Grande Torino”, objekt që aktualisht është nën rikonstruksion. Zjarrfikësit që kanë ndërhyrë menjëherë në vendngjartje kanë bërë të mundur minimizimin e dëmeve dhe kanë njoftuar se kanë gjetur një sasi benzine në afërsi të barit. Sipas hetimeve paraprake, nuk përjashtohet mundësia që sulmi të jetë kryer si pasojë e rivalitetit të tifozëve. Ndërkohë, në prag të derbit numër 191 midis Torinos dhe Juventusit janë parashikuar masa të jashtëzakonshme ka policia. Në një takim midis përfaqësuesve të prefekturës, forcave të rendit dhe të dy klubeve është rënë dakort për një numër të shtuar të policisë dhe stjuartëve, për të kontrolluar imtësisht tifozët në portat hyrëse, për të penguar hedhjen e sendeve në fushë, si dhe evitimin e banerave provokues. Duhet kujtuar që takimi i vitit të shkuar u shoqërua me incidente, siç ishte sulmi ndaj autobuzit të Juventusit nga një turmë tifozësh.
