Ministri i Jashtëm grek Nikos Kotzias, në një intervistë për gazetën greke “Real News” e quan budallallëk historik ligjin e luftës me Shqipërinë: “Nuk mund të ketë as edhe një dyshim formal se të dy vendet janë në gjendje lufte.”
Sipas historianit Arben Llalla, ky është mashtrimi i radhës së ministrit të Jashtëm Kotzias, i cili është një mjeshtër i përdorimit të fjalorit të ëmbël diplomatik.
“Greqia zyrtarisht është në gjendje Lufte me Shqipërinë, sepse që kur ajo i shpalli luftë Shqipërisë në 9 nëntor 1940 (fletorja zyrtare e mbretërisë së Greqisë 10.11.1940) sekuestroi dhe konservoi të gjitha pronat e shqiptarëve me shtetësi shqiptare dhe shtetësi greke. Ligji i Luftës i shpallur njëanshëm nga Greqia me Shqipërinë u rishpall edhe në vitin 1966. Janë bërë tentativa herë pas herë nga të dy vendet për heqjen e këtij ligji, por Kuvendi i Greqisë që nga vitet 1980 e në vazhdim ka votuar që Ligji i Luftës të ekzistojë.
Greqia po ngul shenjat e kufirit për të ashtuquajturën Autonomia e Veriut të Epirit dhe shqiptarët nuk po e kuptojnë. Varrezat e 8 mijë ushtarëve grekë, zhurma që Himara dhe Korça janë zona greke s‘janë të rastësishme. Para disa muajve Greqia bleu ndërtesën e një shqiptari në Korçë (bëhet fjalë për ish-selinë e PD që u dogj në vitin 1997), ku ka jetuar dikur poeti, novelisti grek Jorgos Seferis dhe do ta kthejë në një vend të shenjtë pelegrinazhi, sikur kjo shtëpia nuk ka qenë e shqiptarëve por e Seferit. Jorgos Seferis ishte diplomat i Greqisë 1936-1937 në Korçë dhe në atë shtëpi ka jetuar me qera. Por Greqia po ndërton Mitet e Veriut të Epirit.
Greqia i ka bërë planet e saj për 100 vitet e ardhshme për asimilimin dhe aneksimin e jugut të Shqipërisë me të ashtuquajtura vende të shenjta pelegrinazhi, si në Bularat të Gjirokastrës, Këlcyrë të Përmetit, Himarë, Korçë dhe së fundi në vitin 2018 në Katedralja Ortodokse në Tiranë, ku gjendet gati varri i “shqiptarit” me origjinë greke, Kryepeshkopit Anastas. Ka disa vite që këto vende i vizitojnë grupe të organizuara nga shteti grek si vende të shenjta.”
