Kryetari i Grupit Parlamentar të LSI Petrit Vasili në mbledhjen e Komitetit Drejtues Kombëtar, lidhur me protestën e ditës së nesërme, ka deklaruar se nesër me mijëra njerëz të tjerë do jenë përjashta, për ta ruajtur që reforma në drejtësi të mos vdesë.
Vasili shtoi se ne jemi misionarët e Reformës në Drejtësi, ata janë shkatërruesit e Reformës në Drejtësi.
Fjala e plotë
Sot jemi të gjithë të thirrur së bashku, dhe nëpërmjet nesh, që këtu, të gjithë mijëra njerëz që duan një Shqipëri ndryshe, qofshin këta mbështetës të cilët kanë vënë zemrat te LSI, por edhe mijëra e mijëra shqiptarë të cilët nuk e duan një Shqipëri të tillë. Ora e qëndresës është sot, nuk është nesër.
Nesër në një shtet të uzurpuar dhe të kapur prej fyti, është dita e zgjedhës, nuk është dita e lirisë. Duke filluar nga nesër, po u them me bindje të plotë se çdo lloj sakrifice nuk është asgjë në raport me atë që fiton vendi. Unë bashkohem 100 për qind me atë që kryetarja e LSI ka thënë që ai nuk ka parë gjë akoma, dhe një nga ato gjërat që ai nuk ka parë akoma fillon nesër.
Reforma në drejtësi, nëpërmjet së cilës duan të rrëmbejnë Kryeprokurorin, e kam thënë edhe herë tjetër, pavarësisht komenteve që I janë bërë kësaj fjale, komente në shqip apo në anglisht, reforma në këtë mënyrë se si duan ta pushtojnë, se si duan ta gllabërojnë është një reformë e vdekur. Ne jemi nesër atje, dhe mijëra njerëz të tjerë do jenë përjashta, për ta ruajtur që reforma të mos vdesë. Ne jemi misionarët e Reformës në Drejtësi, ata janë shkatërruesit e Reformës në Drejtësi.
Ne jemi ata që milituam vërtet dhe dhamë votat për një Reformë në Drejtësi të barabartë për të gjithë, ndërsa ata duan të rrëmbejnë Kryeprokurorin, duan të bëjnë drejtësinë për veten e tyre dhe të jetë një hu në duart e tyre kundrejtj çdo qytetari. Dikush më pyeti përse duhet të dalin njerëzit nesër, për çështjen e një Kryeprokuri? Jo, as emri i Kryeprokurorit nuk është problemi ynë, për çështjen e një prokurori, jo as emri i prokurorit nuk është problemi ynë dhe nuk ka për të qenë problemi ynë sikurse nuk ka qenë asnjëherë problem ynë.
