Ministri Xhafaj pret homologun francez në Tiranë

Ministri i Brendshëm Fatmir Xhafaj priti Ministrin e Shtetit dhe Ministër i Brendshëm i Francës Gerard Collomb, i cili po zhvillon një vizitë zyrtare dyditore në Tiranë.

Ministri Collomb u shpreh gjatë takimit se krimi nuk ka nacionalitet, por është transnacional, e në të implikohen shtetas të ndryshëm nga vende të ndryshme. Kjo sipas tij, imponon krijimin e një marrëdhënie të re mes vendeve, në këtë luftë.

Ministri francez e mbështeti kërkesën e ministrit Xhafaj dhe premtoi në kuadër të operacionit “Forca e Ligjit”, atashimin pranë Policisë shqiptare të dy oficerëve të specializuar në luftën ndaj grupeve kriminale dhe pastrimit të parave, krahas atyre të ardhur nga SHBA dhe Gjermania.

Ministri Xhafaj u ndal tek lufta antikanabis dhe nënvizoi se janë marrë masat për vitin 2018, dhe Shqipëria nuk do të jetë në listën e vendeve ku kultivohet kanabis.