Drejtoria e Hetimit dhe Ndjekjes Penale do të drejtohet nga Adnan Xholi dhe përbëhet nga 6 prokurorë, ndryshime në Apel dhe disa prokurori në rrethe
Prokurori i Përgjithshëm Adriatik Llalla ka njoftuar ndryshimet rrënjësore në prokuroritë e të rretheve dhe atë të përgjithshmen. Përmes një njoftimi për mediat, Prokuroria sqaron se në përfundim të analizave vjetore të vitit 2015, rifreskohet kuadri drejtues në disa njësi strukturore në të tre nivelet, me qëllim rritjen e çilësisë në ndjekjen penale.
Në Prokurorinë e Përgjithshme
Drejtoria Gjyqësore dhe e Ekzekutimeve të Dënimeve Penale shkrihet dhe stafi i saj integrohet në Drejtorinë e Hetimit dhe Ndjekjes Penale. Drejtoria e riformatuar do të vijojë të drejtohet nga Adnan Xholi dhe tashmë do të përbëhet nga 6 prokurorë.
Në nivelin e Prokurorisë së Apelit
Kleanthi Zeka, aktualisht prokuror në Prokurorinë e Apelit Vlorë, komandohet drejtues i saj, duke zëvendësuar drejtuesin e deritanishëm, Henrik Haxhiraj, i cili do të vijojë të ushtrojë funksionet e prokurorit të thjeshtë në Apelin e Vlorës.
Në nivelin e Prokurorisë së shkallës së parë
Besim Hajdarmataj, aktualisht zëvendës drejtues në Prokurorinë për Krime të Rënda, komandohet drejtues në këtë strukturë, duke zëvendësuar Blerim Tominaj, i cili do të vijojë të ushtrojë funksionet pranë kësaj prokurorie.
Zeqir Hoda, aktualisht drejtues në Prokurorinë e Kurbinit, komandohet drejtues në Prokurorinë e Lezhës, duke zëvendësuar, Përparim Vukaj, i cili do të vijojë të ushtrojë funksionet pranë asaj prokurorie.
Hysni Vata, aktualisht prokuror në Dibër, komandohet drejtues i Prokurorisë së Kurbinit, duke zëvendësuar Zeqir Hoda, i cili është komanduar në drejtimin e Prokurorisë Lezhë.
Arjan Muçaj, aktualisht prokuror në Prokurorinë e Rrethit Gjyqësor Gjirokastër, komandohet drejtues në Prokurorinë e Rrethit Përmet, duke zëvendësuar Silvana Pani, e cila vijon në detyrën e prokurorit të thjeshtë në atë prokurori.
Artur Ismailukaj, aktualisht prokuror në Prokurorinë e Rrethit Gjyqësor Tropojë, komandohet drejtues në këtë Prokurori, duke zëvendësuar Artan Shtrungza, i cila vijon në detyrën e prokurorit të thjeshtë në atë njësi strukturore.
Urim Buçi, aktualisht prokuror në Prokurorinë e Rrethit Gjyqësor Dibër, komandohet drejtues në këtë Prokurori, duke zëvendësuar Esmeralda Çami, e cila vijon në detyrën e prokurorit të thjeshtë në atë njësi strukturore.
Në Prokurorinë e Korçës komandohet zëvendës drejtues prokurore Dhorina Theodhori, e cila zëvendëson në këtë detyrë prokuroren Ollga Visi
Në Prokurorinë e Vlorës komandohet zëvendës drejtues prokurore Flora Çela, e cila zëvendëson në këtë detyrë prokurorin Alfred Saliu
Në Prokurorinë e Elbasanit largohen nga funksioni i zëvendës drejtuesit dy prokurorët, Alfred Shehu dhe Ridvan Suka. Gjithashtu shkurtohet një pozicion zëvendës drejtuesi, duke u reduktuar në një post, në të cilin komandohet prokurorja Enkelejda Millonai.
Ndërkohë, po shqyrtohen mundësitë e ndryshimeve të tjera, me synim përmirësimin e mëtejshëm të aktivitetit institucional.
