Pas mbledhjes së kabinetit qeveritar pasditen e sotme në qytetin e Shkodrës, Kryeministri Edi Rama ka komunikuar vendimet e marra nga Këshilli i Ministrave.
“Sot kemi nisur aktivitetin e përmuajshëm të qeverisë në qarkun e Shkodrës për muajin dhjetor, dhe sapo kemi përfunduar mbledhjen e qeverisë e cila i hap rrugë një numri projektesh të rëndësishme që synojnë transformimin e mëtejshëm të qytetit si një kryeqendër turistike, por edhe të gjithë qarkut të Shkodrës. Kemi aprovuar një dokument drejtimesh për ndërhyrjet prioritare në Shkodrën turistike, që është një orientim i zhvillimit të integruar, bërë në bashkëpunim me drejtuesit vendorë duke marrë në konsideratë të gjitha kërkesat dhe ato çka kemi regjistruar gjatë bashkëbisedimit me ta në muajt paraardhës, si dhe dëgjesat e kryera gjatë periudhës pas zgjedhore dhe qytetarët në të gjithë qarkun. Më tutje kemi miratuar vendimin për shpalljen e qendrës historike të Thethit, dhe të zonës së mbrojtur përreth saj, një zotim i bërë në fushatë, i cili lidhet me domosdoshmërinë për t’u fokusuar më shumë në burime financiare për gjithë atë zonë të mrekullueshme, duke filluar nga rindërtimi i rrugës së Thethit. Bashkëlidhur me këtë vendim është miratuar edhe rregullorja për mbrojtjen, konservimin, dhe administrimin e vlerave historiko-kulturore të qendrës, dhe të gjithë asaj zone që vihet në mbrojtje. Po ashtu në rregulloren e miratuar, përcaktohet edhe modaliteti i bashkëpunimit me bashkinë Shkodër për ruajtjen dhe promovimin sa më mirë të vlerave turistike, historike dhe kulturore të zonës së Thethit”, u shpreh Rama.
