Tre hidrocentralet e mëdha në Drin janë me regjim të plotë shfrytëzimi
Reshjet e kanë përkeqësuar situatën edhe në basenet e Kaskadës së hidrocentrave të lumit Drin. Liqenet e Fierzës, komanit e Vaut të Dejës po shkojnë drejt niveleve të tyre maksimale. Fierza është në nivelin e 293.5 metër vetëm 1.5 metër larg nivelit maksimal. E ngjashme është situata edhe në dy hidrocentralet e tjera, Koman e Vau i Dejës. Sipas njoftimit të fundit të KESH, ndonëse thuhet se situata është nën kontroll nga hidrocentrali i Vaut të Dejës shkarkohen drejt NënShkodrës 870 metër kub ujë në sekondë. Sipas njoftimit të KESH, prurjet natyrale të regjistruara në Kaskadë gjatë 24 orëve të fundit kanë qenë mesatarisht rreth 1050 m3/sek., 750 m3/sek ne basenin e HEC Fierzës, 240 m3/sek në basenin e HEC Koman dhe 65 m3/sek në basenin e HEC Vau Dejës.
Si për të dashur të justifikojë veten nga një përmbytje e mundshme KESH vë në dukje se prurjet e larta nuk vijnë vetëm nga Drini. Në njoftim shkruhet: Sjellim në vëmendje faktin që më poshtë, lumi Buna pret jo vetëm prurjet që trajtohen nëpërmjet tri HEC-eve të Kaskadës, por edhe prujet nga lumenjtë e Gjadrit, Kirit që nuk vijnë nga baseni i lumit Drin, e që nga Liqeni i Shkodrës, derdhen direkt në Bunë.
Në këtë situatë KESH duke kërkuar edhe mirëkuptimin e mediave e të publikut premton se shkarkimet do të bëhen vetëm kur ato të jenë të domosdoshme, dhe gjithnjë jo më shumë se prurjet natyrale në Kaskaden e Drinit, duke minimizuar kështu pasojat negative për zonat e banuara të ultësirës së nën-Shkodrës.
Të dhënat e Kaskadës Drin
Niveli në HEC Fierzë është 293.45 m, niveli maksimal 295, prurjet 500 m³/sek
Niveli në HEC Koman është 173.49 m, niveli maksimal 175 prurjet 180m³/sek,
Niveli në HEC V.Dejës është 74.87 m, niveli maksimal 76 prurjet rreth70m³/sek
