Në “Ditën pa makina” organizuar nga Bashkia e Tiranës, kryebashkiaku Erion Veliaj deklaroi se shumë shpejt do të nisin testimet e autobusëve elektrikë, të cilat reduktojnë ndotjen dhe mbrojnë ambientin.
“Jemi momentalisht duke siguruar stacionet e karikimit të shpejtë. Na duhet t’i stabilizojmë stacionet. Na duhet të testojmë sa herë hapen e mbyllen dyert, testimi na siguron që ne të bëjmë porosi. Nëse nuk blini autobusë elektrikë, do t’i blejë bashkia. Ambicia jonë është që të jemi si gjithë qytetet e tjera”, tha ai.
Veliaj paralajmëroi masa drastike me gjoba për të gjithë ata që bllokojnë me automjete korsitë e dedikuara për biçikleta.
“Është trefishuar numri i biçikletave që qarkullojnë në Tiranë. Bashkia do gjobisë këdo që bllokon me makinë korsitë e dedikuara. Do i luajmë fenë me gjoba, nëse nuk e kanë problem të zënë korsinë për 30 mijë lekë, as ne se kemi problem të vëmë gjoba”, tha Veliaj.
