Tenderët me negociim, pa shpallje, janë konsideruar si gangrena e fondeve publike për shkak se mungon tërësisht konkurrenca mes subjekeve private dhe ata që e pësojnë janë pikërisht qytetarët, nga taksat e të cilëve duhet të paguhen më tepër para për të marrë një shërbim apo përfunduar një investim.
Por, pavarësisht këtij “sikleti” të madh që hasin fondet publike prej kësaj forme tenderimi si edhe paralajmërimeve të vazhdueshme të ndërkombëtarëve për shmangien e tij, ka mjaft njësi të cilat bëjnë sikur nuk kuptojnë dhe vijojnë me këto procedura korruptive.
Rasti me flagrant është një prej tenderëve të muajit mars 2020 të Ujësjellësit të Tiranës, të cilët kanë vënë në dispozicion një fond limit prej 99,385,000 lekë ndaj kompanive të sigurimeve për roje private si edhe transportin e parave që paguajnë qytetarët për faturat e ujit në sportele.
Siç duket edhe nga dokumetacioni, ashtu siç udhëzon edhe rregullorja, UKT gjoja ka tentuar dy herë për të zhvilluar këtë tender me procedurë të hapur, por nuk ka patur më shumë se 2 pjesëmarrës në garë.
Në këto kushte, kur nuk ka më shumë se 2 pjesëmarrës, autoriteti kontraktues është i detyruar që të kalojë në procedurën “me negocim, pa shpallje”. Këtë ka bërë edhe Ujësjellësi Kanalizime Tiranë duke mos u menduar dy herë.
Ndërkohë që më herët nuk kishin dashur të futeshin të tenderin e hapur të UKT, kur vjen puna për negocim të drejtpërdrejtë, në proces futen menjëherë katër kompani sigurimi, siç është “Global Security“; “Eurogjici”; “Breçani” dhe “PC Security”. Në vend që të futeshin në tenderin e hapur dhe të garonin me njëra-tjetrën për një çmim dhe shërbim më të mirë duke bërë që kryeqytetasit të paguanin më pak tarifa dhe taksa, këto kompani u lejuan nga UKT që të uleshin në tavolinë dhe të flisnin për çmimin.
Në përfundim të negociatës, nga fondi limit (çmimi maksimal) prej 99,385,000 lekësh, UKT mori përsipër që t’i paguajë kompanive në fjalë 99,376,837,56 lekë, ose sa 99% e fondit limit.
Kjo është minimumi një shpërdorim i hapur dhe maksimumi një vjedhje e pastër e parave të kryeqytetasve, të cilëve iu duhet të paguajnë faturën e ujit sa frëngu pulën në Tiranë.
Më herët, 27.al raportoi edhe për tenderin e 600 milion lekë të “ECO Tirana” për të blerë karburant për pastimin e kryeqytetit. Ky tender u fitua pa gare fare me 100% të fondit limit nga “Kastrati” dhe “RESULI ER” me bekimin e Arbjan Maznikut, në rolin e administratorit të kompanisë.
Zakonisht, tenderët bëhen që subjektet private të konkurrojnë me njeri-tjetrin dhe të ofrojnë një çmim më të ulët në dobi të fondeve publike, por dy skandalet e publikuara sëfundmi nga 27.al dhe të tjera që do të vijnë, tregojnë se e gjithë kjo vjedhje po bëhet me bekimin e Veliajt.
SPAK-u bëri mirë që arrestoi kryebashkiakun dhe disa zyrtarë të dorës së dytë në Lushnje, por kësaj radhe nuk ka pse të lodhet fare deri atje, i ka në mes të Tiranës ata që i duhen. /27.al
