Gati 500 familje në Hotin e Ri, Shkodër, vuajnë prej ditësh për energji elektrike. Ata tregojnë se po bëjnë 3 ditë që kanë probleme me energjinë, pasi iu shkëputet për orë të tëra, ose bëjnë gjatë ditës shkëputje të shpeshta të paparalajmëruara. Për këtë arsye ata kanë dalë sot në protestë para OSHEE Shkodër, ku i bëjnë thirrje të zgjidhin këtë problem sa më parë.
Një nga banorët shprehet se, ata kanë bërë dhe më parë një ankesë por askush nuk e ka marrë parasysh. Ndërsa tregojnë se kanë paguar rregullisht faturat për energjinë, ata paralajmërojnë se do të ashpërojnë protestën dhe do të bllokojnë rrugët kryesore.
“Janë rreth 500 familje në këtë zonë që përballen me këtë problem. Kemi gati 4 netë pa drita, vijnë 1 orë dhe fiken, vijnë e ikin si në mesjetë. Ne faturat i paguajmë tamam. Edhe kur vjen korrenti vjen shumë i dobët. Ne kemi ardhur me takuar drejtorin, por ai nuk del na fshihet. Ne bllokojmë rrugën nëse nuk gjejmë zgjidhje”, tha një banorë.
Ndërkohë një tjetër ka treguar se nuk mund të rrinë pa energji elektrike, për shkak se nuk kanë me çfarë të ngrohen. Ndërsa tregon se iu janë djegur pajisjet elektronike për shkak se energjia shkëputet shpesh.
“Ne kemi pyetur, pse fiken dritat në të njëjtin orar, asnjëherë nuk na kanë dhënë një shpjegim. Vetëm 20 shtëpia marrin drita ne tjerët jo. Në këtë temperatura të ulta nuk është normale mos me pas drita. Na janë djegur pajisjet shtëpiake pasi i bëjnë dritat fiku-ndizu. Desh na mori shtëpia flakë se bëri masë lavatriçja. Është e turpshme sepse për faturat vijnë, ndërsa për të na dhënë shërbimin as që duken fare”, tha ai.
Pavarësisht se banorët ndodhen për më shumë se një orë në protestë, drejtori i OSHEE Shkodër nuk ka dalë që të diskutojë me ta, apo të marrë një masë për zgjidhjen e këtij problemi.
