Si sot një vit më parë nisi aventurën e vet mediatike portali 27.al. Zakonisht, në ditë të këtilla thuren lavde dhe bëhet një farë autoreklame. Nuk po e bëjmë një gjë të këtillë, sepse do të qëllojë shumë bajate, por po themi vetëm që gjatë gjithë këtij viti kemi prekur dhe parë nga afër sesi politika, media kanë prodhuar edhe më shumë tollovi, ndërsa sherri na ka shoqëruar çdo ditë të këtyre 12 muajve.
Megjithatë, në të njëjtën kohë me shumë kënaqësi kemi vënë re se si po shpëtojmë nga gracka e kompleksit të inferioritetit që na ka ngjizur ndaj Çështjes Kombëtare internacionalizmi proletar. Tash, jo vetëm flitet, por edhe veprohet në mbrojtje të identitetit shqiptar, madje duke prekur tema deri dje tabu si Çështja Çame. Natyrisht, diku në këtë ngrehinë një gur të vogël do ketë vënë edhe 27.al. Ndaj urimi i vetëm për sot është: Do Zoti jemi këtu edhe vitin tjetër!
